Kơnong 2 hrơi pơphun, djop anih anom amăng tơhan kông ang tơring čar Lâm Đồng hơmâo tŭ mă gơnam djru mơng ƀing apăn bruă, tơhan kông ang hăng mơnuih ƀôn sang amăng ƀon lan hăng abih tih 34 tơ̆n añăm tam, hơbơi pơtơi, boh troh djop mơta.

Amăng lơ 2/12 abih bang añăm tam, hơbơi pơtơi, boh troh hơmâo anom bruă djru tui tlôn gum hrŏm anom bruă kơđi čar, kông ang tơring čar Lâm Đồng kah pơpha, pơdŭ pơgiăng nao 2 boh să: Ninh Phước, Tây Khánh Sơn hăng phường Hòa Thắng, tơring čar Khánh Hòa kiăng djru brơi mơnuih ƀôn sang kual ia dăo, djru brơi mơnuih ƀôn sang hơmâo añăm ƀong rĭm hrơi, tañ hơđong glăi tơlơi hơdip mơda hăng hơkrŭ glăi ngă hmua tơdơi kơ hơjan ia ling dăo.