VOV4.Jarai - Jơnum min mơnuih ƀôn sang tơring čar Kontum hmâo ba tơbiă Tơlơi pơsit ngă tui tơlơi pơsir kơđi hăng hơdră tơglưh trun bruă apăn Khua jơnum min mơnuih ƀôn sang tơring glông Kon Plông, rơwang bruă 2021-2026 hăng ơi Đặng Thanh Nam.

Ơi Đặng Thanh Nam nao pơhmư̆ sa mông jơnum amăng hrơi Grŭp apăn bruă Ping gah tơring čar Kontum jơnum pel ĕp pơsir kơđi hăng ñu

Tom brơi, lơ 21/9/2022, Khul pơ ala mơnuih ƀôn sang tơring glông Kon Plông ăt hmâo ba tơbiă mơn Tơlơi pơtrun pơsit brơi pơdơi bruă ngă Khua pơ ala Khul pơ ala mơnuih ƀôn sang tơring glông Kon Plông tal 15, rơwang bruă 2021-2026 hăng ơi Đặng Thanh Nam yua kơ ngă soh prong hơdôm tơlơi pơkă mơng Ping gah, tơlơi phiăn mơng Kơnuk kơna, ƀu pơhlôm hơdôm tơhnal pơkă mơng Khua pơ ala Khul pơ ala mơnuih ƀôn sang tơring glông. Dưi thâo ơi Đặng Thanh Nam, Kơ-iăng Khua git gai Ping gah tơring glông, Khua Jơnum min mơnuih ƀôn sang tơring glông Kon Plông hmâo arăng brơi pơdơi abih bang bruă amăng Ping gah hăng gong gai bơdjơ̆ nao hơdôm tơlơi ngă soh amăng bruă wai lăng lŏn drŏn hăng tuh pơplai man pơdŏng./.

Siu H’ Prăk: Pơblang