VOV4.Jarai - Ƀơi kual Dăp Kơdư, kơthel tal 4 ngă bơbeč lu ñu ƀơi tơring čar Kontum. Lu jơlan nao rai gun hĭ yua kơ ia ling dăo luh nao hăng tơlơi lŏn tơhlom tơhroh plăng pơgang jơlan. Gơnang kơ gơgrong hlâo bruă pơgang, pơgăn, bŏng glăi hăng hơjan ia ling dăo anun tơdơi kơ hmâo tơlơi răm rai ƀơi dua ară jơlan nao rai, Gơnong bruă jơlan nao rai dŭ pơgiăng tơring čar Kontum hăng gong gai hơdôm bôh tơring glông, plơi prong hmâo iâu pơhrui khul mơnuih pơhlôm glăi jơlan nao rai hăng pok pơhai pơkra glăi anô̆ răm rai.

Hơdôm anih lŏn tơhroh ƀơi jơlan mrô 24 dưi kuăi rơmet tañ laih

Rơđah biă ñu, ƀơi jơlan Hồ Chí Minh črăn găn tơring glông Đăk Glei ƀơi anăp tơlơi ia ling dăo luh nao prong ngă lip dơlăm, khul mơnuih gơgrong bruă pơkra glăi pơkiăo nao mơnuih dô̆ gak, hlă hnal lăi pơtă hlâo ƀu brơi mơnuih hăng rơdêh găn nao rai ƀơi anih ia lip dơlăm kiăng pơhlôm kơ pô. Jơlan mrô 40B črăn găn tơring glông Tŭ Mrông, Jơlan 24 črăn găn tơring glông Kon Plông hmâo lu anih lŏn tơhroh. Khul gơgrong pơsir anô̆ răm rai iâu pơhrui măi mok hăng mơnuih mă bruă kuăi rơmet, anun jơlan nao rai hluh gah./.

VOV4.TN čih

Siu H’ Prăk pơblang