Tui hăng mrô jŭ yap blung a, Dak Lăk hơmâo sa čô mơnuih djai; lu sang dŏ tơpok pơbung, đa tơglưh mơtăm, gơnam tam răm rai yua ia tơluh; hơdôm glông jơlan nao rai dăo abih. Đại tá Lê Văn Hùng, Kơ-iăng khua git gai, Khua pơphô bruă Anom git gai tơhan tơring čar Dak Lăk brơi thâo, amăng mlăm anun mơtăm, hơdôm rơtuh čô khua, ling tơhan djă ba kanô, rơdêh nao pơ anih ia dăo dlăm, anih ƀu thâo tơbiă hyu či ba pơđuăi mơnuih ƀôn sang, ba đuăi ƀing tha, ƀing čơđai nao pơ anih hơđong. Tơdơi kơ abih kơthel, mlăm anun mơn, ơi Đào Mỹ, Kơ-iăng khua Jơnum min mơnuih ƀôn sang tơring čar Dak Lăk, khua git gai gơnong bruă git gai phun ƀơi phường Sông Cầu nao sem lăng anih hơmâo tơlơi truh, git gai pơkra, pơsir brơi, biă ñu pơhŭi hlâo kiăng rơnuk rơnua kơ mơnuih ƀôn sang lơ̆m glăi kih rơmet sang anŏ, hŭi hơmâo tơlơi truh yua apui lơtrik tơ̆i, phun kyâo rơbuh hăng gơnam djhueng tlâ̆o djơ̆ tơdơi kơthel.

Ră anai, mơnuih apăn bruă ƀơi Dak Lăk dŏ gak hrơi mlăm, lăng glăi abih hơdôm anih dŏ dăo, djru mơnuih ƀôn sang pơwơ̆t glăi pơ sang, hơđong tơlơi hơdip, rơmet, duñ pơƀut kyâo jôh, sem lăng apui lơtrik, kiăng dưi pơwơ̆t glăi hơdip mơda tañ hloh.

Čih pioh hơdôm tơlơi pơhing blung a đơ đam tơring čar Gia Lai hơmâo 2 čô mơnuih djai yua kơthel ngă. Rơngiao kơ anun, hơmâo 2 čô dŏ ƀơi phường Quy Nhơn hăng phường An Nhơn rơka. Rơnoh jŭ yap blung a ƀơi Gia Lai hơmâo 45 boh sang dlưh ƀhiao, rơbêh 2.400 boh sang pok bơbung. Kơthel mrô 13 ăt ngă kơ sa boh song pơkup hĭ amăng ia, 3 bit anih jơlan nao rai ƀơi să An Vinh lŏn tơhlŏm. Ƀơi kual Hoài Nhơn Bắc, ia rơsĭ blai puh yă ngă ling 3000 boh sang anŏ, ia lip dơlăm mơ̆ng 10-40 cm dua čơgam, ƀơi anŏ dơlăm truh pă čơgam. Hơdôm rơbâo ha hmua pơdai hăng đang añăm pơtam răm rai, lu drơi rơmô kơbao, bê bui, mơnŭ bip djai; phun kyâo, gong apui lơtrik, pơnang pôr hăng bah amăng hăng mơnil pơčah, bơrơbuh hăng dlưh trun, răm rai kơtang. Đơ đam tơring čar thăm apui lơtrik  ƀơi lu plơi pla, pơhiăp telephôn pơtruh nao rai tơlơi pơhing lu anih ƀu thâo truh hăng tơ̆i đưn, truh ră anai aka ƀu hmư̆ lăi pơthâo bruă rŭ glăi, pơsir tơlơi răm ƀăm hiư̆m pă. Ră anai, lu plơi pla, să ăt dŏ jŭ yap glăi, čih pioh anŏ răm ƀăm, yua kơ lu anih dŏ aka ƀu dưi truh nao rai, yua aka ƀu thâo pơhiăp hăng phôn ƀu thâo truh tơlơi pơhing.

Ƀơi tơring čar Quảng Ngãi, tui mrô jŭ yap aka ƀu djŏp djel, 50 boh sang tơpok pơbung tôl, răm kơtang, kơnong ƀơi să Long Phụng, răm rai kơtang hloh hăng 45 boh sang tơplok pơbung tôl yua hơkruah yâo. Tơlơi anai brơi ƀuh kual ter hang ia rơsĭ hăng kual dơnung ăt jing anih bơbeč yua kơtang hloh lơ̆m hơmâo kơthel pưh nao. Kơ jơlan nao rai, lu glông jơlan juăt nao rai kơđông hĭ mơn. Tơlơi anai brơi ƀuh tơlơi hŭi rơhyưt amuñ tơhŏm ƀơi kual čư̆ siăng ăt kơtang đôč, biă ñu ia hram amăng lŏn, ngă lŏn tơdu abih ƀu kĕ dong tah. Ră anai hơdôm boh tơring glăk jŭ yap glăi anŏ răm rai, ming pơkra jăng jai, laih dong krăp lăng hơdôm anih amuñ hơmâo tơlơi truh kiăng pơhlôm hơđong rơnuk rơnua kơ mơnuih ƀôn sang.