Jơnum anai lĕ sa tơlơi pơtom hiăp nao rai ngă tui na nao hăng tong ten plah wah kơnuk kơna Việt Nam hăng khul khua mua mơnuih ngă bruă mơdrô kiăng pơblih ngă gêh găl brơi sĭ mơdrô tui anŏ či kiăng pioh pơtrut pơđĭ kyar amăng khul mơnuih ngă bruă mơdrô yua mơnuih ƀôn sang ngă pô, gêh găl hloh kơ bruă tuh pơ alin, djru hrŏm pơtrut pơđĭ kyar bơwih ƀong huă hơđong ƀơi Việt Nam. Ƀơi mông jơnum ƀing khua mua sang bruă mơdrô bơni biă mă hơdôm tơlơi pơblih phrâo lăng nao pơ anăp adih pơđĭ kyar ƀơi Việt Nam hăng lăi, bruă čih pơkra hră pơtrun kah hăng “ Hră pơtrun mrô 57 kơ bruă pơtrut boh thâo ia rơgơi, tơlơi pơhing hmar hăng pơblih tơlơi pơčeh phrâo; Hră pơtrun mrô 59 kơ bruă mut phung hăng jar kmar; Hră pơtrun 68 kơ bruă pơđĭ kyar bơwih ƀong huă, sang bruă mơnuih ƀôn sang ngă pô hăng Hră pơtrun 66 pơblih tui bruă čih pơkra hăng ngă tui tơlơi phiăn……

Hơdôm tơlơi rơkâo mơ̆ng kơnuk kơna čih pơtô ba hăng anăp či ngă bruă rơđah rơđong kiăng ngă pơhrŏ hĭ anŏ pleh ploh plah wah gơnong dlông hăng tơring čar, khom ngă tui sa hnơ̆ng amăng bruă git gai wai lăng bruă mă amăng dêh čar. Pơhiăp ƀơi mông jơnum, Khua dêh čar ơi Phạm Minh Chính klah čun glăi tơlơi pơhing bơwih ƀong huă, mơnuih mơnam Việt Nam hăng lăi pơtong: Việt Nam pơkă tơhnal pơđĭ kyar 8% amăng thun 2025 hăng 2 mrô amăng hơdôm thun tŏ tui, amăng anun pơtrut bơwih ƀong huă mơtah mơda, bơwih ƀong huă mrô jing sa bruă khom ngă, tơlơi pơtrun brơi ngă tui sit nik hăng gêh găl djơ̆ hnơ̆ng pơđĭ kyar. Kơnuk kơna amra pơtum git gai djop ding jum, anom bruă, tơring čar pơphun bruă mă, gir run, khut khăt rŭ glăi bruă mă kiăng găn rơgao tơlơi tơnap tap, gum pơgôp nao rai, prăp lui hmar beč bal hloh, ba yua boh thâo ia rơgơi tŭ yua phrâo. Khua dêh čar đăo kơnang khul mơnuih ngă bruă mơdrô FDI amra gum hrŏm  Việt Nam, djru pơčeh phrâo hơdră bơwih ƀong huă mơtah mơda, pơhno hăng tơlơi tơpă hơđong kơjăp, yua tơlơi hing ang hrŏm amăng kual laih anun ƀơi rŏng lŏn tơnah hnun mơ̆n.