Kiăng kơtưn đĭ, pơđĭ tui bôh tơhnal pơhing bơkơtuai kơ tơlơi dưi ană mơnuih, amăng 2 hrơi lơ 26, 27/10, ƀơi plơi prong Kon Tum, Ding jum wai lăng tơlơi pơhing hăng pôr pơhing dêh čar ta gum hrŏm hăng Grŭp črâo ba tơlơi dưi ană mơnuih mơ̆ng Gong gai dêh čar hăng Jơnum min mơnuih ƀôn sang tơring čar Kon Tum pơphun Jơnum pơhrăm bruă pôr pơhing bơkơtuai kơ tơlơi dưi ană mơnuih brơi giăm truh 200 čô mơnuih pơ ala lĕ mơnuih apăn bruă mă bruă pôr pơhing, bruă tơlơi dưi ană mơnuih 19 bôh tơring čar, ƀôn prong kual Dap Kơdư, Yŭ Dơnung dêh čar hăng ƀôn prong Hồ Chí Minh.

Amăng 2 hrơi ƀing mơnuih pơ ala nao pơhmư̆ mông Jơnum pơhrăm bruă pơhing bơkơtuai kơ tơlơi dưi ană mơnuih hmâo lăi pơthâo abih Tơlơi pơsit mơ̆ng Khua dêh čar kơ pơsit Akô̆ bruă pôr pơhing kơ tơlơi dưi ană mơnuih; tơlơi pơhing kơ tơlơi mă tŭ tơlơi đăo pioh ngă bruă pơkon hơdôm hrơi rơgao hăng bơdjơ̆ nao bruă pơhing bơkơtuai; pơtô brơi pơtrut lăi pơhưč gru rŭp plơi pla kơ dêh čar tač rơngiao; tơlơi găn rơgao pôr pơhing amăng măi mok pôr pơhing bơkơtuai hăng jar kơmar; bruă mă gah tơlơi dưi ană mơnuih hăng sa dua mơta jơlan gah pơsit bruă pôr pơhing kơ tơlơi dưi ană mơnuih./.