Mơng akŏ thun hrăm 2022-2023 truh ră anai, amăng tơring čar Lâm Đồng ƀuh 5 wŏt ƀing čơđai mơng gưl sa truh gưl tlâo bơrơtaih ngă lu mơnuih bơngŏt. Amăng anun, lu bruă lĕ yua lu mơnuih taih ha čô čơđai ngă rơka rơkač khŏm ba nao pơ sang ia jrao. Bruă phrâo anai lĕ 2 čô đah kơmơi ƀơi sa boh sang hră gưl sa ƀơi phường 2, plơi prong Đà Lạt hơmâo sa čô đah rơkơi mơng gah rơngiao sang hră dui gơñu mut amăng sang juă glai laih anun pơgô̆ mă. Sa bruă kơtang hloh lĕ amăng yang hrơi lơ 21/10, sa čô čơđai đah rơkơi hrăm anih 9 ƀơi sang hră gưl dua Nam Ban (tơring glông Lâm Hà) arăng tlŏ djai lơ̆m phrâo tơbiă mơng sang hră hăng glăk amăng jơlan glăi pơ sang.

Tui ơi Huỳnh Quang Long, kơ-iăng Khua gơnong bruă pơtô pơjuăt tơring čar Lâm Đồng, bruă čơđai sang hră bơrơtaih amăng tơring čar glăk ngă tơnap tap, sa, dua bruă ba glăi tơlơi truh sat kơtang, bơdjơ̆ nao tơlơi hơdip, tơlơi suaih pral kơ ƀing čơđai sang hră, ngă bral rơngal amăng mơnuih mơnam hăng ba glăi tơlơi bơngŏt amăng mơnuih mơnam.

“Amăng sang hră lu mơnuih glăk bơngŏt, mơng nai pơtô truh pơ sang hră lơ̆m nao hơpă lêng kơ hmư̆ arăng lăi nao bruă anai. Laih anun ƀing čơđai juăt tum pơƀut bơră ruai kơ bruă anai, ngă lu mơnuih ƀơi sang hră anai bơngŏt. Laih dong, anai lĕ bruă ngă ƀing amĭ ama čơđai hŭi, ngă kơ anih pơtô hrăm tơlơi hiam klă ră anai rơngiă hĭ tơlơi yôm phăn anai. Hăng abih bang mơnuih đing nao biă mă kơ bruă anai hăng tơlơi anai bơdjơ̆ nao bruă črâo ba ƀing čơđai hơdip hiam klă. Hơdôm tơlơi sat giăm anai pơdah ƀing čơđai glăk hơdip aka ƀu djơ̆.

Ƀơi anăp kơ bruă čơđai sang hră bơrơtaih lu tui, Jơnum min mơnuih ƀon sang tơring čar Lâm Đồng hơmâo hră pơtrun rơkâo khua gơnong bruă pơtô pơjuăt git gai, gum hrŏm hăng Khua gơnong bruă mă, tơhan rơka hăng mơnuih mơnam, Khua kông ang tơring čar hăng Khua Jơnum min mơnuih ƀon sang hơdôm boh tơring glông, plơi prong, khua mua hơdôm gơnong bruă, anom bruă, khul grup, anom bruă bơdjơ̆ nao amăng tơring čar hơmâo hơdră pơsir hĭ. Amăng anun, đing nao bruă črâo ba, pơtrut pran gơgrong mơng ƀing apăn bruă, nai pơtô, čơđai sang hră hăng sang anŏ gơñu kơ bruă pơgăn ƀing čơđai bơrơtaih; pok pơhai ngă tui hơdôm hơdră pơhlôm rơnuk rơnua, hơđong ƀơi amăng jang sang hră hăng jum dar anun, hmao tlôn pơgăn ƀing mơnuih mơng gah rơngiao mut nai pơgô̆ ƀing čơđai sang hră.

Amăng blan 9 hăng blan 10 laih rơgao, amăng tơring čar Dak Lak ƀuh lu bruă ƀing čơđai bơrơtaih. Amăng anun kơtang hloh ƀuh 2 wŏt ƀơi sang hră gưl tlâo Krông Ana hăng ƀơi sang hră gưl dua Nguyễn Du, plơi prong Buôn Hồ. Ơi Phạm Đăng Khoa, Khua gơnong bruă pơtô pơjuăt Dak Lak brơi thâo, bruă čơđai sang hră bơrơtaih juăt ƀuh gah rơngiao sang hră, tơdơi kơ mông hrăm giong. Ba truh tơlơi anai lĕ yua amĭ ama aka ƀu đing nao, bơbeč mơng hơdôm tơlơi ƀing gơñu lăng hăng ƀuh amăng plang internet. Kiăng pơplih hĭ, gơnong bruă pơtô pơjuăt Dak Lak rơkâo djop sang hră kơtưn wai lăng ƀing čơđai, pơphun pơtô pơblang tơlơi phiăn, hơdôm mông črâo ba kiăng ƀing čơđai sang hră thâo hluh rơđah dong mơng anun amra lui hĭ bơrơtaih. Ơi Phạm Đăng Khoa brơi thâo:

“Ƀing gơmơi hơmâo jao ƀruă brơi sang hră, ƀing nai wai lăng rĭm anih hrăm, brơi hơdôm grup hlăk ai amăng sang hră đing nao ƀing čơđai sang anŏ tơnap tap ƀudah  glăk bưp tơlơi glêh tơnap amăng sang anŏ kiăng hmao tlôn djru brơi ƀing čơđai mơng anun amra pơgăn bruă ƀing čơđai bơrơtaih”.

Bruă čơđai bơrơtaih ră anai glăk ngă bơngŏt lơ̆m anŏ ba truh jai hrơi kơtang tui hăng ngă tơnap tap, bơdjơ̆ nao tơlơi hơdip, tơlơi suaih pral kơ ƀing čơđai sang hră. Gah rơngiao jơnum Khua pơ ala mơnuih ƀon sang dêh čar, sa, dua čô khua brơi thâo, sang anŏ, sang hră hăng mơnuih mơnam kiăng gum tơngan hrŏm črâo brơi ƀing čơđai thâo hluh bruă ƀing gơñu ngă. Amăng jơnum lok 4, Khua pơ ala mơnuih ƀon sang dêh čar tal 15, lu khua mua hơmâo lăi nao tơlơi sit nik anai. Tui Đặng Bích Ngọc,  Khua pơ ala mơnuih ƀon sang tơring čar Hoà Bình: čơđai sang hră ră anai hơmâo lu tơlơi bơbeč nao, amăng anun mơng plang intenet. Yua anun kiăng tơlơi gum hrŏm kjăp kơplah wah sang hră hăng sang anŏ ƀing čơđai:

“Kiăng hơmâo tơlơi gum hrŏm kjăp kơplah wah sang anŏ hăng sang hră, kah hăng kiăng pơphun mông jơnum bơkơtuai, pơlăi nao rai hơdôm bruă juăt ƀuh, hơdôm bruă sat bơdjơ̆ nao tơlơi hơdip kơ ƀing čơđai, kiăng ngă hiưm pă ƀing čơđai thâo hluh rơđah. Sang anŏ ăt ƀu dưi jao abih kơ nai pơtô, mơ̆ kiăng đing nao tơña bla na nao. Ƀing amĭ amai ƀing čơđai kiăng jê̆ giăm hăng sang hră, ƀing nai pơtô kah mơng thâo hluh ană bă”.

Sa, dua čô Khua pơ ala mơnuih ƀon sang ăt brơi thâo, sang hră kiăng đing nao pơtô hrăm sa, dua tơlơi hrăm črâo brơi ƀing čơđai hơdip hiam, mơng anun ƀing gơñu amra hơmâo bruă mă djơ̆, gơgrong mơng anun amra pơgang, pơgăn bruă ƀing čơđai bơrơtaih.