Lơ̆m pok pơhai ngă tui amăng hrơi mông ječ ameč pơkơdong glăi hăng tơlơi soh sat amăng bơyan giăm truh têt thun 2025, ƀing tơhan djop anom bruă mơ̆ng kơnuk kơna tơring glông Đưk Kơ, tơring čar Gia Lai hơmâo ƀuh hăng pơgăn 2 wơ̆t arăng ngă soh, mă pơkong 4 čô mơnuih pơgiăng 220 kg mlăi sĭ mơdrô dop. Trung tá Nguyễn Lê Hồ Tân Ảnh, Khua grup tơhan pơlih ĕp tơlơi soh gah bruă bơwih bong huă hăng tơlơi soh ma túy mơ̆ng anom bruă kông an tơring glông Đưk Kơ, brơi thâo

"Lu mlăi sĭ mơdrô dop ba mơ̆ng dêh čar Kur mut pơ Việt Nam. Hơdră gơñu ngă juăt pơthâo amăng plang mơnuih mơnam facebook pơčah anih blơi anih tŭ mă gơnam. Gơñu dưm mlăi amăng kơsăk pâo ƀudah pơgiăng hăng rơdêh krua, rơdêh pơgiăng tuai, pơdop amăng rơdêh pơgiăng. Tơlơi pơhing mơ̆ng mơnuih ƀôn sang lăi pơthâo sit biă mă. Ngă hrŏm lu anom bruă, khul grup mơnuih mơnam, tơhan pơgang guai dêh čar, tơhan anom bruă mă jia kiăng thâo tơlơi pơhing ĕp lăng bruă pơdŭ pơgiăng sĭ mơdrô dop mlăi laih anun mă pơkong".

Ƀơi kual giăm guai dêh čar tơring glông Đưk Kơ, Gia Lai tơhan kơnuk kơna ngă hrŏm tong ten djru pơgang tơlơi rơnuk rơnua mơnuih mơnam, pơgăn tơlơi soh sat. Đại tá Nguyễn Văn Nghị, Kơiăng khua anom git gai ping gah sang bruă tơhan pơgang guai dêh čar tơring čar Gia Lai, brơi thâo, ƀing tơhan pơgang guai dêh čar ngă hrŏm tơhan kông an Gia Lai, brơi thâo, ƀing tơhan pơgang guai dêh čar hơmâo hơdai gum hrŏm kông an hơdôm tơring glông Đưk Kơ, Čư̆ Prong, Ia Grai hơmâo mă pơkong truh 1000 kg mlăi arăng pơgiăng hyu sĭ mơdrô ča čot.

Amăng hơdôm thun rơgao, amăng kual giăm guai dêh čar tơring čar Gia Lai hơmâo na nao tơlơi soh sat sĭ mơdrô dop mlăi amăng hrơi giăm têt, tơhan pơgang guai dêh čar tơring čar Gia Lai hơmâo pok pơhai akŏ bruă pơgăn tơlơi soh sat sĭ mơdrô dop mlăi.

Thun blan rơgao hơmâo mơnuih ƀôn sang lăi pơthâo tơlơi pơhing anun dưi hơmâo mă pơkong lu wơ̆t arăng ngă soh sĭ mơdrô dŏp mlăi găn rơgao ƀơi guai dêh čar. Ƀing gơmơi kơnang kơ mơnuih ƀôn sang djru, anun kiăo mă pơkong hăng pơgăn hmao kru ƀing sĭ mơdrô dop mlăi ƀơi guai dêh čar tơring čar Gia Lai kiăng rơnuk rơnua hơđong.