Hơjan ia dăo rơnuč blan 11/2025 ƀơi tơring čar Khánh Hoà ngă răm rai kơtang rơbêh 6.000 klai prăk, ngă 22 čô mơnuih djai, 20 čô mơnuih rơka hăng hơdôm rơtuh boh sang anŏ bơbeč yua. Ơi Nguyễn Hồng Trường, Khua Anom pơkă ayuh hyiăng lŏn adai tơring čar Khánh Hoà brơi thâo, tơlơi truh lŏn adai ngă jai hrơi phara. Ƀơi ia krông Cái Nha Trang, mah aka ƀu rơgao ia dăo hmư̆ hing đưm hlâo gah hlâo ia, samơ̆ ƀơi dơnung hơmâo ia dăo lu hloh kơ mơ̆ng hlâo. Phun ñu lĕ hơjan prong wơ̆t hăng bruă čuk pơkra pơdong plơi prong anun yơh ngă añĕp tui glông ia rông, ia dun glăi. Pơ anai ia krông ber, kơdư, kual lŏn dăo kơhñĕp anun yơh ngă ia lip tañ, ruk đuăi tañ mơn, samơ̆ trơi truh sat jai hrơi prong tui “Ƀing gơmơi glăk kač glăi rim nam ia dăo ƀơi anih ia dăo dlăm hloh. Kah hăng ƀơi sang kâo anai jing nam ia dăo mơn, laih anun anom bruă kơnuk kơna hơmâo giăm 20 boh sang anŏ ngă bruă kơnuk kơn soh, hơmâo sang dăo mơ̆ng 1 truh giăm 2 met, anun jing nam ia dăo. Mơ̆ng anun, anom bruă čih hră lơkak anih ia dăo, ngă phun tơhnal či pơphô brơi Jơnum min mơnuih ƀôn sang tơring čar prăp rơmet, akŏ pơjing, pơđĭ tui bruă pơgang pơhlom tơlơi truh lŏn adai ngă pơ anăp”.

Sit tơlơi hơmâo mơ̆ng bruă pơgang ia dăo rơnuč thun hlâo, Thiếu tướng Nguyễn Túy, Khua git gai tơhan tơring čar Khánh Hòa, črâo pơƀuh hơdôm tơlơi aka ƀu djơ̆ kiăng pơsir hĭ: bruă thâo djŏp tơlơi amăng plơi pla aka ƀu klă, ƀu tañ ôh, tơlơi ngă hrŏm plah wah djŏp anom bruă dŏ sư̆ rơbư̆ mơn, tơlơi pơtrun “4 ƀơi anih” aka ƀu hơdeč hmar ôh, laih anun bruă pơhiăp nao rai git gai ƀơi anŏ ñu tơ̆i dơnuai mơn. Thiếu tướng Nguyễn Túy kiăng čih pơkra hlao hră lơkak anih ia dăo đah mơ̆ng krăp lăng plơi pla, ba pơđuăi hlao ană plơi mơ̆ng anih hŭi rơhyưt; prăp lui rơdêh, song nan, gơnam tam; pơtŏp rơguăt bruă, ngă hrŏm kjăp hloh đah mơ̆ng dưi djru mơnuih ƀôn sang: “Anom bruă tơhan git gai pơgang pơhlôm hlâo tơring čar git gai hơdôm boh tơring, anom bruă pel ĕp, lăng glăi abih plơi pla, anih dŏ, anom bruă kơnuk kơna, anih mă bruă, anih pơdong puih kơđông; khut ba pơđuăi mơnuih ƀôn sang, rơdêh, măi mok, gơnam tam, tơbiă mơ̆ng anih hŭi rơhyưt. Laih dong, lăi pơthâo hăng Jơnum min mơnuih ƀôn sang tơring čar čih pơkra hơdră đĭ kyar bơwih ƀong huă - mơnuih mơnam tŭ yua kơ dua bơnah, lăp djơ̆ hăng tơlơi hơmâo amăng plơi pla, amra bơwih brơi bruă pơgang pơhlom hlâo tơlơi truh lŏn adai ngă hăng hyu mơnuih bưp tơlơi truh”.

Ơi Trần Phong, Khua Jơnum min mơnuih ƀôn sang tơring čar Khánh Hoà lăi, kiăng lăng glăi bruă pơgang tơlơi truh lŏn adai ngă tui jơlan hơdră ƀing ta prăp rơmet hlâo, prăp lui sui. Hrŏm hăng lăng glăi abih hơdôm kual hŭi rơhyưt, tơring čar kiăng čih pơkra giong hơdră pơgang pơhlom hlâo tơlơi truh lŏn adai, pơđĭ tui tơlơi rơgơi git gai, črâo bruă hăng pơtrut mă yua boh thâo ia rơgơi lơ̆m krăp lăng, đao lăng hlâo, pơhŭi hlâo: “Kiăng ječ ameč lăng glăi, pơplih ming, čih pơkra Akŏ bruă pơgang tơlơi truh lŏn adai ngă rơwang thun 2026-2030; čih pioh djŏp hơdră pơgang tui hăng mrô pơkă hŭi rơhyưt phara, kiăo tui rim kual, rim boh plơi. Laih dong, pơđĭ tui anŏ klă bruă git gai, pơtô ba; pơtrut mă yua boh thâo mrô, mă yua boh thâo ia rơgơi lơ̆m krăp lăng, đao lăng, pơhŭi hlâo hăng git gai pơ plơi pla”.

Sit tơlơi hơmâo ƀơi Khánh Hòa brơi ƀuh, amăng hrơi adai pơplih phara, tơlơi truh ƀu tui hơđăp dong tah. Lơ̆m tơlơi rơnuk rơnua ƀu hơđong dong tah, jing bruă krăp lăng hlâo, thâo hlâo hăng pơgang hĭ, anun yơh tơlơi akŏ phun dưi pơgang glăi. Hơdôm tơlơi kơđiăng mơ̆ng tal hơjan ia dăo, tơdah hơmâo lăng glăi klă amra jing atur kjăp kiăng tơring čar thâo pơgang hlâo klă hloh ƀơi anăp tơlơi truh lŏn adai ngă, plai mơn răm rai hăng pơhlom rơnuk rơnua kơ mơnuih ƀôn sang./.