Nai Đào Thị Huyền, nai pơtô ƀơi Sang hră gưl sa Ea Trul, să Ea Trul, tơring glông Krông Bông hmâo laih rơbêh 24 thun ngă nai pơtô, ñu brơi thâo, mă bruă ƀơi anih anom tơnap tap, 75% mrô čơđai lĕ ană bă neh wa djuai ania ƀiă anun rim thun leng kơ tui anun, sit truh akô̆ thun hrăm lĕ ƀing nai mơ̆ng sang hră glăi hyu yap glăi hră čih ană čơđai sang hră nao tal sang pơsur čơđai sang hră nao hrăm.

  “Lơm nao hrăm ƀing čơđai ăt juăt pơdơi mơn yua kơ tơlơi hơdip sang anô̆ tơnap tap, amĭ ama čơđai hyu mă bruă pơ̆ ataih ƀu hmâo wai lăng anun djơ̆ anô̆ ñu pơdơi, yua anun yơh nai wai lăng anih hrăm nao tơl sang ƀing čơđai pioh pơsur ƀing čơđai nao hrăm, čang rơmang ƀing čơđai thâo bôh hră. Lơm nao pơtô kâo juăt nao tơl sang pơsur čơđai nao hrăm tŭč rơnuč ñu pơsur čơđai ăt nao hrăm triăng hloh mơn”.

Ơi Nguyễn Văn Tiến, Khua Sang hră gưl sa Ea Trul, să Ea Trul, tơring glông Krông Bông brơi thâo, thun hrăm anai, sang hră hmâo giăm truh 650 čô čơđai sang hră. Sang hră hrưn đĭ abih bang mrô čơđai nao sang hră hrăm tum djop. Kiăng hmâo bôh tơhnal tui tơlơi ba tơbiă, rơngiao kơ bruă pơdŏng kơčăo bruă, pơphun jơnum nai wai lăng anih hrăm, pơpha gum hrŏm hăng gong gai abih bang pơsur čơđai sang hră nao hrăm, sang hră dô̆ iâo pơthưr klă ƀing thâo tơngia gum djru ƀing čơđai sang hră hmâo tơlơi hơdip tơnap kiăng ƀing čơđai hmâo tơlơi gal hơđong pran jua hrăm hră. Ơi Nguyễn Văn Tiến lăi pơthâo:

   “Sang hră pơkĕ hrŏm hăng gong gai plơi pla, hơdôm khul grŭp gum djru, djru brơi 50 per hơdrôm hră hrăm anih 4, 500 per sum ao. Hăng Gơnong bruă pơtô pơhrăm hăng Sang bruă sĭ mơdrô hơdrôm hră, gơnam mă yua hrăm hră Dak Lak djru brơi 10 čô čơđai anih sa 10 per hơdrôm hră. Hrŏm hăng anun, sang hră hmâo pơkĕ hrŏm laih hăng khul amĭ ama čơđai sang hră hmâo blơi laih 500 pok hră čih hăng sa dua ƀĕ gai čih pioh prăp lui kơ ƀing čơđai dong mơ̆ng akô̆ thun tơdah ƀing čơđai hơpă akă hmâo hră čih, gai čih kiăng hrăm hră amăng thun hrăm 2023-2024”.

Tui hăng ơi Huỳnh Viết Trung, Khua Anom bruă pơtô pơhrăm tơring glông Krông Bông, truh ră anai kah hăng abih bang hơdôm bôh sang hră hmâo prăp lui kơ thun hrăm phrâo. Anih anom mă yua, nai pơtô phun ñu pơhlôm, djop tui jơlan hơdră pơtô pơhrăm phrâo. Čơđai sang hră hơdôm gưl ƀơi tơring glông nao hrăm djop tum mơn. Khă hnun hai, kiăng ƀing čơđai triăng nao hrăm, Anom bruă pơtô pơhrăm tơring glông hmâo ba tơbiă laih hră pơ-ar črâo ba hơdôm bôh sang hră gum hrŏm klă hăng gưl ping gah, gong gai tơring glông gum hrŏm kiăng lăi pơhing kơ amĭ ama čơđai sang hră đing nao, ngă gal brơi kơ ană bă nao hrăm hră. Ơi Huỳnh Viết Trung brơi thâo:

  “Pơsur čơđai sang hră nao hrăm ƀơi hơdôm kual tơnap tap phun ñu pơhlôm, dô̆ sa dua mrô ƀiă mơn ƀing gơmơi hmâo gum hrŏm laih hăng gong gai tơring glông hơdôm bôh sang hră kiăng đing nao črâo ba. Tui kơčăo bruă lĕ 15/8 pơđut ruah čơđai mut hrăm, khă hnun hai ƀing gơmơi ăt khom kơdun glăi mơn hrơi mông hăng amra truh lơ 5/9 ƀing čơđai hơpă akă nao hrăm ăt pơsur dong mơn kiăng ƀing čơđai nao hrăm pioh pơhlôm bruă čơđai nao sang hră tum djop, ƀu rơkut”.

Hăng hơdôm tơlơi gir run mơng gơnong bruă pơtô pơhrăm tơring glông Krông Bông, tơring čar Dak Lak amăng bruă pơsur čơđai sang hră nao hrăm hră dong mơ̆ng hơdôm hrơi akô̆ thun hrăm amra jing gru klă kơ sa thun hrăm phrâo ba glăi bôh tơhnal prong./.