Tơdơi kơ 40 thun pơplih phrâo, hơdôm tơlơi dưi ngă prong, yom biă mă amăng thun blan đĭ kyar bơwih ƀong huă - mơnuih mơnam, bong kjăp, hơđong kơđi čar, pơhlom pơgang lŏn ia - rơnuk rơnua hăng mut hrŏm hăng jar kmar dlăm biă, anun yơh ngă atur kjăp phik, ngă kjăp tui tơlơi kơnang mơ̆ng Mơnuih ƀôn sang hăng Ping gah. Boh nik ñu ƀơi Dap Kơdư jing pơsit brơi jơlan ngă bruă lăp djơ̆ anun. Mơnuih ƀôn sang kual Dap Kơdưb čang rơmang hăng tơlơi truh kih mơ̆ng mông Jơnum ping gah tal 14, hơdôm tơlơi pơtrun prong, sui thun amra hơmâo ngă tañ. Ayong Y Sắc Ly Arul, dŏ pơ phương Buôn Ma Thuột, tơring čar Dak Lăk čang rơmang, hơdôm tơlơi pơtrun prong mơ̆ng Ping gah amra tañ ngă giong, pơplih rơđah amăng bơwih ƀong huă - mơnuih mơnam, biă ñu lĕ hăng kual mơnuih ƀôn sang djuai ƀiă:“Kâo čang rơmang Ping gah hăng Kơnuk kơna lăng ba lu hloh dong kơ neh met wa djuai ania ƀiă, amăng anun hơmâo mơnuih ƀôn sang djuai ania Êđê gơmơi; lăng ba bruă răk pioh, pơtrut tui gru grua hiam mơ̆ng đưm, hrŏm hơbit hăng đĭ kyar tuai hyu ngui, kiăng tơlơi hơdip neh met wa pơ anai jai hrơi đĭ tui”.

Amăng hơdôm thun rơgao, yua hơmâo Ping gah hăng Kơnuk kơna lăng ba, hơmâo lu tơlơi pơtrun lăp djơ̆, anun yơh hơmâo tơlơi pơplih prong biă amăng tơlơi hơdip mơnuih ƀôn sang djuai ania ƀiă. Mơ̆ng jơlan nao rai, pơtô hrăm, ia jrao truh kơ djru ngă hmua pơkra gơnam, hrŏ trun ƀun rin hơđong kjăp, djă pioh rak lui gru grua hiam...lu hơdră djru mut amăng tơlơi hơdip mơda, ba glăi boh tŭ yua rơđah rơđông, hơmâo mơnuih ƀôn sang tŭ ư biă. Amăng hrơi mông mơak mơak Jơnum ruah khua ping gah dêh čar tal 14 truh kih, ơi Hmên, dŏ pơ plơi Tuơh Ktu, să Đăk Đoa, tơring čar Gia Lai brơi thâo:“Kâo mơak biă mă, lăng djơ̆ pran yua tơlơi git gai mơ̆ng Kơnuk kơna leng kơ ba tơbiă hơdră ngă bruă yom, biă ñu lĕ hơdră djru brơi neh met wa djuai ania ƀiă, djru djŏp mơta kơ neh met wa ƀing gơmơi. Kâo đăo kơnang: pơ anăp Ping gah, Kơnuk kơna ăt lăng ba, git gai lŏn ia hrưn đĭ hloh, neh met wa ha pran dong yua, kiăo tui. Ping gah amra hơmâo hơdră djru lăp djơ̆ kiăng lŏn ia ta jai hrơi đĭ kyar kjăp kơtang hloh”.

Mơ̆ng tơlơi hơmâo sit amăng tơlơi hơdip, ƀing khua, mơnuih ping gah hăng Mơnuih ƀôn sang djŏp tơring ƀơi Dap Kơdư hăng Dơnung Tong Krah đăo kơnang kơ Ping gah, ngă pơgiong jơlan hơdră djru mơnuih ƀôn sang djuai ania ƀiă tui jơlan pơtrut anŏ kơtang amăng lăm, lăng mơnuih ƀôn sang yơh pô či đĭ kyar, mơ̆ng đĭ kyar tuai hyu ngui amăng plơi pla truh kơ tuh pơ alin anih anom, jơlan nao rai, pơhlom hơmâo tơlơi bơwih ƀong kjăp ƀơi anăp tơlơi pơplih ayuh hyiăng. Yă Rơ Châm H’Yéo, Khua hơđăp Jơnum min djŏp djuai ania mơnuih mơnam Việt Nam tơring čar Gia Lai pơsit, tơlơi đăo kơnang kơ Ping gah hơmâo pơbă tui, pơtrut đĭ mơ̆ng lu rơnuk, laih anun mông anai hơmâo pơtrut tui dong:“Mơnuih ƀôn sang Dap Kơdư ha pran kiăo tui Ping gah, tui Wa Hồ. Čang rơmang Ping gah ta lăng ba dong, ngă găl brơi kơ Dap Kơdư đĭ kyar bơwih ƀong, gru grua, pơtô hrăm, hăng bruă akŏ pơdong kual Dap Kơdư pơdrong gah bơwih ƀong, pơdrong gah tơlơi rơgơi”.