Amăng mrô anai giăm 2,6 klăk čô mơnuih ƀôn sang đơ đam tơring čar Lâm Đồng 99,66% mrô mơnuih ƀôn sang nao plĕ hră. Amăng anun hơmâo 59/124 gưl să; 1.951/2.296 kual plĕ hră truh pơ 100% mrô mơnuih nao plĕ hră. Tui Jơnum min plĕ hră tơring čar Lâm Đồng, mơnuih ƀôn sang ruah khua đơ đam tơring čar lêng kơ hur har mut hrŏm hrơi plĕ hră, pơdah pran bơtŭ ư, đăo gơnang nao tal plĕ hră. Mơnuih ƀôn sang đing nao ĕp lăng tơlơi pơhing kơ ƀing tơbiă anăn hlâo kơ nao plĕ hră. Mơnuih ƀôn sang lêng pơdah pran gơgrong, gum pơgôp hăng đăo gơnang nao tơlơi truh kih mơng hrơi plĕ hră ruah khua mua.

Tơring čar Gia Lai hơmâo laih 99,76% mrô mơnuih nao plĕ hră ruah khua pơ ala mơnuih ƀôn sang dêh čar tal 16 hăng khua pơ ala mơnuih ƀôn sang djŏp gưl, rơwang thun 2026-2031. Tơring čar Gia Lai čih pioh mrô mơnuih nao plĕ hră lu biă. Amăng giăm 2,6 klăk čô mơnuih hơmâo anăn plĕ hră, 99,76% mrô mơnuih nao plĕ hră. Lăp đing nao, 96/135 boh să, phương hơmâo 100% mơtăm mơnuih nao plĕ hră. Tơlơi anai brơi ƀuh, tơlơi thâo pơmin hăng pran jua tŭ ư hrŏm, thâo gum pơgôp mơ̆ng abih bang mơnuih amăng hrơi mơak prong mơ̆ng lŏn ia ta, laih dong lăi nao tơlơi prăp rơmet tong ten mơ̆ng tơring čar. Mơnuih ƀon sang bơni biă kơ bruă prăp rơmet, pơphun bruă ruah khua mơ̆ng djŏp gưl, anom bruă mơ̆ng tơring čar Gia Lai. Laih dong, čang rơmang ƀing khua tơdơi kơ hơmâo ruah đĭ, djơ̆ anăn ngă khua, amra pơhmư̆ hăng ngă bruă yua kơ tơlơi đĭ kyar mơ̆ng plơi pla hăng lŏn ia ta.

Khul git gai plĕ hră ruah khua tơring čar Khánh Hòa brơi thâo, tal plĕ hră ruah Khua pơ ala mơnuih ƀôn sang dêh čar XVI hăng Jơnum min pơ ala mơnuih ƀôn sang djop gưl rơwang thun 2026-2031 amăng tơring čar pơphun truh kih, truh 5 mông tlam, mrô mơnuih nao plĕ hră truh 99%, 47/65 boh să, phường bul pơtâo hơmâo mrô mơnuih nao plĕ hră truh 100%.

Ơi Nghiêm Xuân Thành, Khua git gai Ping gah tơring čar, Khua khul git gai plĕ hră ruah khua tơring čar Khánh Hòa rơkâo grup jŭ yap hră plĕ ngă tui djơ̆ tơlơi pơkă, kơtưn pel ĕp, krăo lăng, anăm brơi ƀuh tơlơi ƀom kiơng. Hơdôm anom bruă bơdjơ̆ nao pơgiong hră pơ-ar kiăng lăi pơthâo kơ bruă plĕ hră mơng ƀon lan brơi Khul plĕ hră ruah khua dêh čar hăng lăi pơthâo boh than djơ̆ hrơi mông pơkă.