Rơnuč rơwang hrơi tơjuh rơgao, Jơnum min mơnuih ƀôn sang să Ea Tul, tơring glông Čư̆ M’gar (Dak Lăk) pơphun “Hrơi abih bang mơnuih pơgang rơnuk rơnua thun 2023”. Nao pơhmư̆ mông jơnum hơmâo Kơ-iăng khua dêh čar ơi Trần Lưu Quang, pơ ala kơ khua mua Ding jum kông an, Ping gah tơring čar, Jơnum min mơnuih ƀôn sang tơring čar Dak Lăk hrŏm hăng hơdôm gơnong bruă, anom bruă.

Hơdôm thun rơgao, bruă pơgang rơnuk rơnua lŏn ia ƀơi Ea Tul hơmâo pok pơhai ngă ƀơi abih bang plơi pla, hơmâo boh than lăp hơdor. Hơdôm bruă djuai ania, tơlơi đăo, rơnuk rơnua plơi pla hơmâo djă bong kơjăp; mơnuih ngă soh aset ƀiă mơn, djă bong kơjăp kual plơi pla ƀu hơmâo jrao ma túy, ƀu hơmâo tơlơi truh pơjrom pơtlă rơdêh, mơnuih mă bruă amăng gong gai gum pơgôp, yua kơ mơnuih ƀôn sang mơ̆ bơwih brơi, mơnuih ƀôn sang gum pơgôp, đăo kơnang kơ Ping gah, gong gai. Ơi Y Uốt Ayun - Khua Ping gah să Ea Tul, tơring glông Čư̆ M’gar ră ruai, ră anai 10 boh plơi hăng 1 boh thôn lêng kơ hơmâo dưm camera krăp lăng, laih anun akŏ pơdong grup wai lăng mă pô. Ơi Y Uốt lăi nao bruă abih bang pơgang rơnuk rơnua lŏn ia ƀơi să amăng hrơi blan rơgao.

“Hrơi blan rơgao, kông an apăn bruă glăi pơ să djru hơmâo akŏ pơdong grup wai lăng mă pô, rim mlăm hyu tir, pơgang rơnuk rơnua ƀơi plơi pla. Yua hnun mơn, ƀơi să aka ƀu hơmâo pô dŏp gơnam ôh. Rơngiao kơ anun, mơnuih apăn bruă pơgang rơnuk rơnua iâu pơthưr rơnuk hlăk ai, ƀing čơđai sang hră hơdip hiam, wai lăng kơjăp abih bang mơnuih ngă soh amăng să”.

Nao pơhmư̆ hrơi jơnum, Kơ-iăng khua dêh čar ơi Trần Lưu Quang pơsit, pơpŭ bơni yôm kơ hơdôm boh than mơ̆ng Ping gah, gong gai hăng mơnuih ƀôn sang să Ea Tul hơmâo ngă amăng hrơi blan rơgao. kơ-iăng khua dêh čar kiăng Ping gah, Gong gai hăng Mơnuih ƀôn sang să Ea Tul pơtrut tui pran jua gum pơgôp, prăp rơmet hlâo amăng bruă abih bang gum pơgôp pơhlôm rơnuk rơnua hơđong kơjăp, pơkơdong glăi tơlơi pơčut pơčao, pơkơdong glăi Ping gah, Kơnuk kơna hăng ngă kah ania pơpha djuai ƀơi să lăi hrŏm, tơring čar Dak Lăk lăi hơjăn, djru ngă hơđong rơnuk rơnua, hơđong kơjăp, pơhlôm tơlơi hơdip yâo mơ-ak mơ̆ng mơnuih ƀôn sang. Kơ-iăng khua dêh čar ơi Trần Lưu Quang kiăng Ping gah, Gong gai hăng Mơnuih ƀôn sang să Ea Tul kơ hơdôm tơlơi lăp đing nao anai:

“Khŏm ngă tui klă, tŭ yua djŏp tơlơi pơčrâo trun mơ̆ng Ping gah kơ bruă abih bang mơnuih pơgang rơnuk rơnua lŏn ia. pơtrut tui tơlơi gơgrong bruă nao hlâo mơ̆ng kông an apăn bruă, jơnum min djŏp djuai ania mơnuih mơnam, hơdôm khul grup juăt nao pel ĕp na nao, pơtrut pơsur pơsir hĭ hơdôm tơlơi aka ƀu djơ̆ tơdah hơmâo đah mơ̆ng ngă bruă tŭ yua. Ba bruă anai jai hrơi klă hloh, sit nik, tŭ yua, kiăng abih bang mơnuih ƀôn sang gum ngă”.

Phrâo rơgao, yă Trương Thị Ngọc Ánh, Kơ-iăng khua Jơnum min djŏp djuai ania mơnuih mơnam Việt Nam ăt glăi pơhmư̆ mông Jơnum abih bang mơnuih ƀôn sang gum pơgang rơnuk rơnua ƀơi să Ngok Wang, tơring glông Đăk Hà, tơring čar Kon Tum. Hrơi blan rơgao, Anom bruă git gai pơkơdong mơnuih ngă soh tơlơi phiăn, ngă bruă ƀu hiam hăng akŏ pơdong bruă pơgang rơnuk rơnua lŏn ia tơring glông Đăk Hà pơphô bruă kơ Ping gah tơring glông, Jơnum min mơnuih ƀôn sang tơring glông ngă tŭ yua hơdôm tơlơi pơčrâo trun mơ̆ng Ping gah hăng mơ̆ng tơring čar Kon Tum amăng bruă anai. Tơring glông Đăk Hà hơmâo pơphun 188 hrơi pơtô pơblang kơ bruă abih bang pơgang rơnuk rơnua lŏn ia kơ rơbêh 37.400 wơ̆t čô. Mơnuih ƀôn sang lăi pơthâo hăng tơhan kông an 70 tơlơi pơhing yôm; jao glăi lu phao kơtuang pơkra mă hăng mơnŏng pơtuh.

Pơhiăp ƀơi mông Jơnum, yă Trương Thị Ngọc Ánh, Kơ-iăng khua jơnum min djŏp djuai ania mơnuih mơnam Việt Nam lăng yôm boh than hơmâo ngă mơ̆ng tơring glông Đăk Hà, tơring čar Kon Tum amăng bruă pôr pơhing, iâu pơthưr hăng pơphun bruă Abih bang mơnuih pơgang rơnuk rơnua Lŏn ia; pơsit anŏ yôm mơ̆ng bruă mă hăng tơlơi rơnuk rơnua hơđong mơ̆ng plơi pla. Ƀơi anăp bruă ƀu klă pơtruh hăng khul grup pơblư̆ lŏn ia pơčut pơčao, ngă pơčlah djuai ania hăng pơphun pơblư̆ pơkơdong glăi gong gai, yă Trương Thị Ngọc Ánh kiăng:

“Grup pơphun bruă pơtrut pơphô bruă kiăng ping gah hơmâo hơdră ngă bruă, hơmâo tơlơi git gai kơtang hloh hăng bruă mă. Hơdôm bruă mă mơ̆ng hơdôm anom bruă ding kơna Grup git gai khŏm anăp nao kual plơi pla, kiăo tui tơlơi hơmâo amăng plơi pla, thâo rơđah tơlơi hơdip mơnuih ƀôn sang, thâo tơlơi kiăng khăp mơ̆ng mơnuih ƀôn sang laih anun pơsir hĭ tañ, djơ̆ lăp hơdôm tơlơi rơkâo djơ̆ mơ̆ng abih bang mơnuih ƀôn sang. Kiăng ƀing ta hyu pôr pơthâo, pơtô pơblang tơlơi phiăn kơ mơnuih ƀôn sang kơjăp hloh dong”.