Tui hăng tơlơi lăi pơthâo tañ mơ̆ng jơnum min mơnuih ƀôn sang să Yang Mao, tal hơjan hlin sui hrơi laih rơgao, ngă răm ƀăm kơtang biă mă amăng să. Anŏ răm ƀăm jŭ yap lăng blung a truh 40 klai prăk. Giong hmư̆ lăi pơthâo hăng nao ĕp lăng tơl anih hơmâo tơlơi truh lŏn tơhlŏm, ơi Tạ Anh Tuấn, Khua Jơnum min mơnuih ƀôn sang tơring čar Dak Lak bơni mơ̆n să Yang Mao ngă bruă hăng pơhŭi hâo ăt amra hơmâo đôč anih lŏn či tơhlŏm yua ia kor kơtang, anih dŏ čư̆ siăng, kơdư dung đuai, kơdư čư̆ ƀu hơmâo kyâo pơtâo. Ƀơi anih hơmâo tơlơi truh, Khua jơnum min mơnuih ƀôn sang tơring čar pơtrun hiăp kơ khua mua gong gai să khom pơdŭ đuăi mơnuih ƀôn sang ƀơi anih hŭi rơhyưt, biă mă ñu 20 boh sang anŏ hlăk dŏ ƀơi anih hŭi rơhyưt kơtang. Bruă pơdŭ đuăi mơnuih ƀôn sang khom ngă mơtam, ƀu dŏ tơguan tơl ia hrŏ ôh.

Kơ-iăng Khua Jơnum min mơnuih ƀôn sang tơring čar Gia Lai Dương Mah Tiệp phrâo kĭ kông điêng rơkâo djop ƀôn lan, gơnong bruă, sang bruă amăng tơring čar gơgrong pok pơhai hơdôm hơdră pơhlôm hlâo hơjan ia ling dăo hăng lŏn tơhroh, kiăng kơ plai ƀiă anŏ răm rai yua hơjan ia ling dăo. Amăng kông điêng, Jơnum min mơnuih ƀôn sang hơdôm boh să, phường kiăng kiăo tui lăng na nao tơlơi pơhing pơhŭi hlâo hơjan ia lip; tơlơi pơhing kơ bruă pok ia mơng hơdôm boh dơnao, bruă ia lip, ia kor, lŏn tơhroh…jăng hmao tlôn lăi pơthâo gong gai ƀon lan, mơnuih ƀôn sang thâo kiăng pơhlôm rơnuk rơnua.

Hơdôm boh ƀon lan tañ ba đuăi mơnuih nao pơ anih kơdư ƀiă; prap lui mơnong ƀong huă, gơnam yua ƀơi anih dŏ kơđăp, sit biă ñu ƀơi anih amra ƀuh lŏn tơhroh hăng ia dăo dơlăm. Ling tơhan, gơnam măi mok hơmâo rơkâo prap lui hăng tơlơi pơsit “4 mơta ƀơi anih” kiăng prap pơhlôm hlâo hơjan sui hrơi, sit biă ñu ƀơi hơdôm kual amuñ ƀuh ia guang dar.

Hơjan ia ling dăo dua hrơi laih rơgao ƀơi Khánh Hòa ngă kơ 8 čô mơnuih djai, 2 čô rơngiă, 19 čô rơka rơkač; rơbêh 7000 ha hmua pơdai hăng phun pla pơkŏn ia dăo mlĕp; lu ring bruă răm ƀăm kơtang. Ƀơi mông jơnum ječ ameč, git gai pơčrâo bruă pơsir tơlơi răm ƀăm truh ia ling dăo ngă, Khua git gai ping gah tơring čar Khánh Hòa ơi Nghiêm Xuân Thành pơtrun hiăp Gơnong bruă ia jrao pơpha ƀing ơi ia jrao hyu mă bruă, ba gơnam pơjrao duăm ruă pơjrao soh sel ƀu mă prăk kơ mơnuih hơmâo tơlơi truh; ngă tui tơlơi gêh găl amăng tơlơi phiăn djru ba mơnuih ƀôn sang kiăng tañ hơđong tơlơi hơdip mơda.

Ơi Nghiêm Xuân Thành lăi pơtong, tơl pơwơ̆t glăi kah hăng tơđar kah rơnuk rơnua; ƀing tơhan djru pơklaih mơnuih ječ ameč khom ngă hrŏm tong ten djop anom bruă tơhan kơnuk kơna pơhlom rơnuk ronua lơ̆m ngă bruă hyu djru ba mơnuih ƀôn sang. Djop plơi pla pơ anih ia ling dăo khom prăp lui djop rơdêh đĭ, gơnam yua mă bruă, ba yua boh thâo ia rơgơi phrâo lăi pơthâo, pôr brơi kơ mơnuih ƀôn sang hăng djop sang bruă prăp lui hlâo bong glăi hăng hơjan hlim ia lip.