Kơ-iăng khua dêh čar kiăng mơnuih apăn bruă pơgang tơlơi truh ngă hiư̆m pă tŭ mơn, amăng tơhrơi mơtăm, ba pơđuăi abih mơnuih ƀôn sang pơ thôn 1, thôn 2,  hăng thôn 3, nao pơ anih rơnuk rơnua; prăp lui măi mok, rơdêh pơhlom hŭi hơmâo hơjan prong kơtang tui. Ñu lăi, khut ƀu brơi mơnuih ƀôn sang dŏ kơđông ƀu thâo tơbiă hyu lơ̆m ia blai đĭ; laih dong kiăng abih bang plơi prăp lui cano song măi djru mơnuih bưp tơlơi truh. Hăng tơlơi đao lăng hơjan dŏ prong đôč ƀơi Khánh Hòa, Dak Lăk hăng Gia Lai, Kơ-iăng khua dêh čar brơi thâo Kơnuk kơna git gai laih hơdôm boh tơring prăp rơmet hơdră pơgang pơhlom rơnuk rơnua kơ ană plơi pla; laih dong git gai Khul tơhan kual 5 djru ba gơnam ƀong huă, amăng anun hơmâo ƀañ tơpung lương khô.

Truh yang hrơi dong (19/11), hơjan prong biă mă ƀơi kual Tong krah, Dap kơdư ngă 15 čô mơnuih djai hăng rơngiă, 19 čô mơnuih rơka. Hơjan ia ling dăo glăk ngă hŭi rơhyưt hloh. Hơdôm boh tơring čar Gia Lai hăng Dak Lak glăk ƀuh hơjan prong hloh, đa hơmâo anih truh 660 milimet. Anŏ răm rai prong biă mă hăng rơbêh 20.400 boh sang ia dăo, lu hloh ƀơi tơring čar Gia Lai hăng Khánh Hòa. Bruă pơhlôm hlâo glăk pok pơhai ječ ameč. Truh ră anai, abih tih 5.634 boh sang anŏ hăng giăm 16.000 čô mơnuih arăng ba nao kơđăp pơ kơdư ƀiă. Anom bruă bơdjơ̆ hơmâo tơlơi pơhing kơ ia lip kơtang amăng ia krông Ba ƀơi Dak Lak hăng ia krông Kôn ƀơi Gia Lai, hăng ia blai prong biă mă dong mrô 3. Him lăng truh mơmŏt lơ 20/11, kual ƀôn prong Đà Nẵng truh pơ Khánh Hòa hăng kual Dap kơdư ăt dŏ ƀuh hơjan prong, đa hơmâo anih rơbêh 400 milimet. Neh met wa kiăng ngă tui hơdôm tơlơi črâo ba mơng gong gai ƀon lan.

Kual ngŏ tơring čar Dak Lăk hơmâo hơjan prong kơtang mơ̆ng lơ 15 truh lơ 19/11, yua hơmâo angin pưh mơ̆ng Ngŏ. Ră anai 34 boh să, phường gah Ngŏ hrŏm hăng lu boh să gah dơnung plung kual M’Drăk, Krông Bông, Ea Súp, Krông Ana...glăk dăo dlăm 1-1,5m, lu anih pơčlah ƀu thâo nao rai. Rơbêh 1.000ha phun pla dăo mlĕp amăng ia, rơbêh 300 drơi bui be, hăng năng ai 5.000 drơi mơnŭ bip ia kor pơđuăi laih; hơdôm glông jơlan ia dăo, tơhlŏm pơčah abih. Gong gai plơi pla ba pơđuăi laih mơnuih ƀôn sang mơ̆ng anih ia dăo, lŏn tơhlŏm, ia kuor. Mơguah lơ 19/11, ƀơi phường Sông Cầu, hơmâo tơlơi truh tơhlŏm čư̆, ngă tơglưh sang hăng ngă amai V.T.U (33 thun), Khua hlăk ai ƀut plơi Dân Phú 2, djai yua. Tơhan apăn bruă amăng tơring čar krăo lăng na nao hơjan ia dăo hăng pok hơdră pơgang ba ană plơi ƀơi hơdôm anih hơmâo tơlơi truh kơtang, hrŏm hăng neh met wa ba mơnuih djai ƀơi Sông Cầu tơbiă đuăi mơ̆ng anih tơhlŏm.

Hơjan prong sui hrơi ngă lip ƀơi lu kual, khŏm brơi 38 boh sang hră hăng rơbêh 26.000 čô čơđai sang hră ƀơi Gia Lai pơdơi sang hră kiăng pơhlôm rơnuk rơnua. Hlâo anun, amăng jơnum lăng nao rai mơng ataih hăng hơdôm gơnong bruă, sang bruă hăng 135 boh să, phường kiăng pok pơhai hơdôm hơdră pơhlôm hlâo hơjan ia ling dăo hăng lŏn tơhroh, Kơ-iăng Khua Jơnum min mơnuih ƀôn sang tơring čar Nguyễn Tuấn Thanh rơkâo gơnong bruă pơtô pơjuăt hluai tui ayuh hyiăng pơplih kiăng brơi ƀing čơđai pơdơi sang hră. Tơdơi kơ git gai, gơnong bruă pơtô pơjuăt tơring čar Gia Lai hơmâo ba tơbiă hră pơ-ar rơkâo hơdôm anom bruă anăm pơtah hơtai; prap lui hlâo hŭi hơjan lu rơgơi kơ tơlơi đăo lăng hlâo, kiăng pơhlôm lui hlâo. Hơdôm boh sang hră hơmâo rơkâo kiăng kiăo tui lăng tơlơi pơhing đăo lăng hlâo hơjan hlim, kiăo tui lăng anih ia dăo, ia lip, lŏn tơhroh; lăi pơthâo brơi hmao tlôn kơ nai pơtô, ƀing čơđai kiăng pơhlôm rơnuk rơnua.