Ƀơi anăp kơ bruă ia lip kơtang hloh ngă dăo dơlăm hăng guang dar lu anih ƀơi kual Ngŏ tơring čar, mơguah lơ 20/11, Dak Lak ba tơbiă tơlơi jak iâu abih bang mơnuih apăn bruă, mơnuih Ping gah, mơnuih ƀôn sang hăng hơdôm anom bơwih ƀong sĭ mơdrô gum tơngan hrŏm djru brơi mơnuih ƀôn sang kual ia ling dăo. Amăng mông jơnum Khul git gai wai pơgang mơnuih ƀôn sang mơguah lơ 20/11, Khua git gai Ping gah tơring čar Lương Nguyễn Minh Triết rơkâo pơkiăo nao lu tơhan, rơdêh, măi mok djru brơi mơnuih ƀôn sang, đĭ nao tơl hơdôm kual guang dar hăng canô, song nan kiăng djru brơi mơnong ƀong huă ƀơi hơdôm kual Tây Hòa, Phú Hòa, Đông Hòa. Ling tơhan Quân khu 5 hơmâo pok pơhai rơbêh 100 boh canô hăng ba pơhrua dong song nan, gơnam măi mok mơng djop bơnah. Quân khu 5 hơmâo pel ĕp tơdron rơdêh por Tuy Hòa kiăng pơhlôm brơi anih rơdêh bek plĕ trun kiăng djru gơnam tam.

Hơjan prong biă mă mơ̆ng mlam lơ 15 truh lơ 20/11, ngă rai ia ling dăo aka ƀu ƀuh djơ̆ ôh ƀơi ia krông Apa, Kỳ Lộ, Bàn Thạch laih anun ngă kơ ia krông Srepok đĭ kơtang biă mă, ling dăo lu anih hăng guang dar lu plơi pla kual gah ngŏ tơring čar Dak Lak. Đơ đam tơring čar čih pioh hơmâo 33.630 boh sang dlưh, rơbêh 11.500 boh sang anŏ ia guang dar hĭ ƀu thâo tơbiă hyu, 11.242 boh sang anŏ khom đuăi pơ anih rơnuk rơnua hyu kơđap ječ ameč. Tơhan pơgang guai dêh čar, kông an tơring čar mơ̆ng tơhan kual 5, tơhan sơlup glăk pok anih hyu djru pơklaih mơnuih ƀôn sang, akŏ pơjing anih gak pơgăn jơlan ƀơi anih hŭi rơhyưt. Jơnum min mơnuih ƀôn sang tơring čar hơmâo djru ječ ameč 30 klai prăk kơ mơnuih ƀôn sang ƀơi 60 boh să, phường pioh pok pơhai bruă mă bong glăi hăng pơsir tơlơi tơnap tap hmar ƀơi anăp ƀơ̆i.

Mơguah lơ 20/11, Jơnum min mơnuih ƀôn sang tơring čar Gia Lai jơnum ječ kơ bruă hơjan ia ling dăo kơtang hloh ƀơi kual Ngŏ. Ră anai giăm 20.000 boh sang anŏ bơdjơ̆ nao, giăm 11.000 čô mơnuih arăng ba nao kơđăp. Kông ang, ling tơhan hăng hơdôm grup djru mơnuih hơmâo iâu pơƀut rơbêh 5.000 čô mơnuih apăn bruă, ling tơhan, 15 boh canô, 43 boh song măi hăng hơdôm rơtuh rơdêh măi mok djru ba đuăi mơnuih, nao mă mơnuih, pơhlôm rơnuk rơnua. Djop sang hră kual Ngŏ tơring čar khŏm pơdơi jang jai hăng sang hră arăng ngă anih brơi mơnuih ƀôn sang nao kơđăp.

Lơ 20/11, tom brơi, tơring čar Khánh Hòa, iâu pơtum lu boh ƀattô, song nan măi pơgiăng tuai hyu ngui mơ̆ng mơnuih ƀôn sang brơi djru hrŏm hyu pơgiăng mơnuih ƀôn sang dŏ amăng anih ia guang dar hĭ ƀu thâo tơbiă đuăi mơ̆ng sang. Khua mua mơ̆ng kơnuk kơna pơphun hyu lu khul grup nao truh pơ anih ataih, hŭi rơhyưt, laih dơ̆ng pơgiăng ba nao mơnong ƀong huă, ia mơñum, pông kơsu pơhlom ƀlung ia brơi kơ mơnuih ƀôn sang. Khua jơnum min mơnuih ƀôn sang tơring čar, ơi Trần Phong pơtrun hiăp brơi Gơnong bruă wai lăng bruă sĭ mơdrô pơphun hmar djru ba mì tôm blơi mơ̆ng djop siêu thị, pioh hyu pơpha brơi kơ mơnuih ƀôn sang, ba yua abih bang song nan, ƀattô pơgiăng tuai mơ̆ng mơnuih ƀôn sang, kiăng djru mơnuih ƀôn sang dŏ amăng anih ia ling dăo kơtang ƀu thâo tơbiă hyu.