Ơi Y Luyện Niê Kdăm, ngă pô pơ ala mơnuih ƀôn sang dêh čar tal X, khua hơđăp git gai ping gah tơring čar Dak Lak lăi, jing pô hơmâo lu hơdră pơblih phrâo kơtang biă mă, hơdôm bruă mă mơ̆ng Khua git gai ping gah ơi Nguyễn Phú Trọng lêng kơ hơmâo ană plơi pla đăo kơnang, ană plơi khăp, ană plơi pơpŭ biă mă.

“Ơi rơngiă laih jing rơngiă hĭ sa čô ană hur har hiam klă mơ̆ng Ping gah, Kơnuk kơna hăng mơnuih ƀôn sang. Ơi khua git gai ping gah  rai čuă tơring čar Dak Lak, jing sa čô mơnuih apăn bruă đing nao biă mă kơ mơnuih ƀôn sang djuai ƀiă, tơlơi hơdip mơda kơ mơnuih mơnam, tơlơi dŏ dong ƀong huă kơ mơnuih ƀôn sang anun lĕ tơlơi đing nao hloh mơ̆ng ñu”.

Djă pioh tơlơi pơtô lăi, pơtă pơtăn mơ̆ng ơi Nguyễn Phú Trọng Khua git gai ping gah dêh čar ta ƀơi mông jơnum khua pơ ala hlăk ai tơdăm dra mut phung Cộng sản Hồ Chí Minh, juăt hlăk ai rơnuk Hồ Chí Minh đơ đam dêh čar tal XII, H’Hương Ƀuôn Krông, Khua git gai anom bruă tơdăm dra mut phung rơnuk Hồ Chí Minh plơi prong Ƀuôn Ma Thuột, tơring čar Dak Lak lăng anun kah hăng anŏ pơtrut pran jua pioh ƀư̆ pơkra pran jua ai hơtai, pơhrăm glăi pô ta. Biă mă ñu nao hlâo kơsem min, hrăm tui tơlơi pơtô pran jua hiam hơkrŭ; nao hlâo amăng bruă hrăm, pơhrăm drơi jăn pô, amăng bruă mă ngă hmua, pơkra ming, thâo pơčeh phrâo; nao hlâo ngă tui bruă mă kơđi čar mơ̆ng dlông jao.

“Anun lĕ pran kơtang pioh kơ kâo hrăm hăng hla tui gru pran jua, tơlơi dŏ dong ƀong huă mơ̆ng Hồ Chí Minh laih anun hrăm tui bruă ngă mơ̆ng Wa Khua git gai ping gah. Hrăm tui tơlơi luă gŭ, pran jua rơ-un rơnang, tong ten, hrăm tui bruă tŭ añ, triăng mă bruă, thâo pơkrem, mă bruă tơpă, rơgoh, abih pran jua. Ăt hrăm tui tơlơi pơmin hơdip mơda, dŏ dong ƀong huă, ƀu hŭi kơ tơnap tap ôh, ƀu hŭi kơ gleh glar hăng gir run kơtưn đĭ pioh akŏ pơjing drơi jăn khin hơtai, kjăp amăng bruă kơđi čar, hơmâo pran jua rơgoh tơpă, tơlơi pơmin hiam klă, tơlơi kiăng prong nao pơ anăp adih”.

Amăng tal nao čuă, mă bruă ƀơi tơring čar Kon Tum blan 4/2011, Khua git gai ping gah, Khua git gai pơ ala mơnuih ƀôn sang dêh čar ơi Nguyễn Phú Trọng hơmâo pioh lu mông nao čuă ană plơi pla djuai ania Bahnar plơi Đak Mut, să Đak Mar, tơring glông Đak Hà. Pơ anai, khua git gai ping gah tơña bla, ĕp lăng tơlơi hơdip mơda, pơđing hmư̆ tơlơi rơkâo, anŏ kiăng mơ̆ng mơnuih ƀôn sang laih anun pơtă pơtăn mơnuih ƀôn sang pơtrut pran jua thâo gum pơgôp, pơčeh phrâo amăng bruă mă.

Tơdơi kơ 13 thun Khua git gai ping gah, Khua git gai pơ ala mơnuih ƀôn sang dêh čar ơi Nguyễn Phú Trọng nao čuă, ơi A Khiê̆u hlăk ngă khua plơi, anun ñu hơdor tong ten biă mă hơdôm tơlơi bơ ră ruai hăng khua git gai ping gah pơhiăp tom ană plơi pla.

“Khua git gai ping gah hơmâo pơtă pơtăn kơ ană plơi pla thâo gum pơgôp, djru nao rai tơdruă, hrŏm hơbit pơđĭ kyar pla kơphê wai lăng đang hmua djơ̆ hơdră pơtô, kiăng pơđĭ tui boh troh. Hmư̆ tơlơi pơhing Wa Khua git gai ping gah rơngiă, mơnuih ƀôn sang djop pô hning tui hăng pioh lu mông h’ŭ hơdor glăi kơ Wa anun, kiăng pơdah pran jua thâo hơdor tơngia kơ Khua git gai ping gah pơtô pơčrâo ba bơwih ƀong huă, mă bruă. Mơnuih ƀôn sang čang rơmang Wa nao hăng tơlơi rơnang blang pran jua hơđong hlong lar”.

Ơi Lê Xuân Hưng, Khua git gai ping gah să Đak Mar, brơi thâo, 13 thun hur har ngă tui tơlơi pơblih phrâo, plơi Đak Mut hơmâo ngă giong laih tơhnal pơkă plơi pla phrâo. Hơdôm thun na nao mơtam plơi anai tŭ mă hră apah bơni kơ boh tơhnal ngă bruă. Tal khua git gai ping gah, khua git gai pơ ala mơnuih ƀôn sang dêh čar ơi Nguyễn Phú Trọng rai čuă hlăk anun, gơnam yua, mơnuih mă bruă kơƀah samơ̆ hơmâo tơlơi pơtô lăi, jing pran kơtang pơtrut pran jua ƀing khua mua apăn bruă, mơnuih ping gah hăng mơnuih ƀôn sang amăng să thâo gum pơgôp nao rai kơtưn ngă giong tơhnal pơkă bruă jao.

“Truh thun 2014, să Đak Mar gơmơi dưi ngă djơ̆ tơhnal pơkă plơi pla phrâo. Mơ̆ng anun truh ră anai, ngă tui tơlơi pơtô lăi, pơtă pơtăn mơ̆ng Khua git gai ping gah, ană plơi pla, abih bang ƀing khua mua, mơnuih ping gah pok pơhai ngă tui pơđĭ kyar bơwih ƀong huă, djă pioh gru grua hiam biă mă ñu pơblih pơjeh djuai phun pla, hlô mơnong rông. Truh ră anai, pơkă dưm dưm rơnoh pơhrui glăi mơ̆ng ană plơi pla, rim čô mơnuih mă bruă sa thun pơhrui glăi 56 klăk prăk. Thun 2022, să Đak Mar ƀing gơmơi dưi ngă djơ̆ tơhnal pơkă să plơi pla phrâo đĭ hloh laih anun gơmơi hlăk man pơdong kiăng jing să plơi pla ba gru phrâo dơ̆ng amăng thun 2025”.

Hăng ană plơi pla djop djuai ania să Ayun, tơring glông Čư̆ Sê, tơring čar Gia Lai, Khua git gai ping gah ơi Nguyễn Phú Trọng ƀu kơnong jing sa čô mơnuih abih tơlơi hơdip yua kơ lŏn ia, yua kơ ană plơi pla đôč ôh, dŏ jing mơnuih brơi kơ ană plơi pla dưi hơmâo tơlơi hơdip mơda trơi pơđao yâo mơak. Amăng tal nao čuă tơring čar Gia Lai blan 4/2017, ơi Nguyễn Phú Trọng Khua git gai ping gah hơmâo nao čuă truh pơ să Ayun, sa boh să tơnap tap ƀun rin hloh ƀơi tơring glông Čư̆ Sê. Pơđing hmư̆ tơlơi rơkâo đĭ mơ̆ng mơnuih ƀôn sang, tơlơi kiăng hơmâo bơnư̆ pơkong ia, ngă hmua pơdai dua bơyan, Khua git gai ping gah hlong pơčrâo trun, git gai brơi pok pơhai bruă man pơkra bơnư̆, pơkong ia plơi Keo. Dua thun tơdơi kơ anun, ring bruă bơnư̆ pơkong ia Plơi Keo ngă giong, hơmâo ia pling mơ̆ng hnoh Ayun, glăi pơ hmua đang mơnuih ƀôn sang ngă hmua pla pơdai dua bơyan dưi trơi pơđao baih. Ơi Đinh A ñur, 73 thun, dŏ ƀơi Ačong, să Ayun lăi:

"Lơ̆m Khua git gai ping gah ơi Nguyễn Phú Trọng rai čuă, kâo mơak biă mă, kâo pơmin sit năng ai ñu amra hơmâo ia yua yơh anai. Ră anai ia mơ̆ng hnoh krông Ayun đĭ pơ hang baih, đĭ pơ čư̆ dơ̆ng, hlâo kơ anun hiư̆m thâo hơmâo. Mơak biă mă, sa thun ngă hmua dua bơyan, klâo bơyan rah pơtem pơdai anun ană plơi pla huăi ư̆ rơpa dơ̆ng tah”.

Hơmâo laih bơnư̆ pơkong ia Plơi Keo, mơnuih ƀôn sang să Ayun hơmâo tơjŭ pla ƀơi 300 hektar hmua ia dua bơyan, tơlơi hơdip mơda hơđong yơh. Tha plơi ơi Đinh Miơč, plơi Ačong, pơpŭ bơni pơyôm biă mă gơnam djru brơi anai mơ̆ng Khua git gai ping gah pioh kơ ană plơi pla Ayun.

“Mơnuih ƀôn sang hok mơak biă mă tơdơi kơ khua git gai ping gah ơi Nguyễn Phú Trọng pơčrâo trun brơi djru mơnuih ƀôn sang hơmâo bơnư̆ pơkong ia, tơlơi hơdip mơda mơnuih ƀôn sang đĭ đăi gŏ amŏ. Ƀing gơmơi amra hơdor na nao hơgĕt wa khua git gai ping gah pioh glăi kơ ană plơi pla Ayun ră anai hăng dĭ da gla kơñ"”

Mơ̆ng hơdôm wơ̆t hyu čuă jơmư, mă bruă kiăng thâo tơlơi pơhing, pơđing hmư̆ tơlơi rơkâo, anŏ kiăng mơ̆ng mơnuih ƀôn sang djop djuai ania kual Dap Kơdư, Khua git gai ping gah ơi Nguyễn Phú Trọng git gai, pơčrâo trun gong gai kơnuk kơna brơi ngă tui djơ̆ jơlan hơdră djru mơnuih ƀôn sang djuai ƀiă ƀơi kual Dap Kơdư. Mơ̆ng anun, djru kơ mơnuih ƀôn sang ƀơi kual anai jai hrơi trơi pơđao yâo mơak, mơnuih ƀôn sang hơdor bơni lu biă mă kơ Khua git gai ping gah dêh čar ơi Nguyễn Phú Trọng!