Thun hrăm anai, đơ đam tơring čar hơmâo giăm 500.000 čô čơđai sang hră djop gưl, amăng anun čơđai sang hră mơnuih djuai ƀiă hơmâo 35%. Jơnum mut thun hrăm phrâo 2024-2025 ƀơi sang hră đôm lăm kơnuk kơna čem rông N’Trang Lơng, plơi prong Ƀuôn Ma Thuột, tơring čar Dak Lak, sang hră anai hơmâo pơsit bruă mă thun hrăm phrâo anai khom pơđĭ tui boh tŭ yua pơtô hrăm, hăng pơtô hrăm ruah mă anŏ phun. Biă mă ñu sang hră đing nao hăng ĕp hơdră tŭ yua hloh pioh pơtô hrăm anun lĕ pơtô hrăm kơ čơđai sang hră mơnuih djuai ƀiă hăng pơtô hrăm gru grua hiam kơ sang hră. Ngă yang jơnum mut thun hrăm phrâo 2024-2025, mơ̆ng plơi prong hlong truh pơ kual plơi pla ataih, kual mơnuih ƀôn sang djuai ƀiă dŏ pơphun hơbôt đôč, tŭ yua yôm hăng ngă bơmơak brơi kơ ƀing nai pơtô hrăm hră laih anun abih bang čơđai sang hră amăng đơ đam tơring čar Dak Lak kơ thun hrăm phrâo.

Mơguah lơ 5/9, rơbêh kơ 400 rơbâo čô čơđai ƀơi tơring čar Gia Lai hur har pran jua nao pơhmư̆ mông ngă Lơphet pok phun thun hrăm phrâo 2024-2025. Ƀơi Sang hră gưl sa Võ Thị Sáu, plơi prong Plei Ku, tơring čar Gia Lai, Khul čơđai dêh čar ta (gah Khul hlăk ai rơnuk Hồ Chí Minh dêh čar ta) hmâo pok phun anăn ñu bruă Grŭp čơđai hăng bruă čơđai muai thun hrăm 2024-2025 hăng brơi 526 pok rup hla kak Việt Nam hrŏm hăng lu anung gơnam tŭ yua kơ čơđai sang hră kah hăng 1.000 blah khăn kă mriah, 13 pok khăn gru Grŭp, hrŏm hăng lu măi mok hrăm hră hăng kual ngui ngor kơ čơđai muai hăng abih bang nua ñu rơbêh kơ 256 klăk prăk. Thun 2024-2025, tơring čar Gia Lai hmâo 759 bôh anih anom pơtô pơhrăm hăng rơbêh kơ 400 rơbâo čô čơđai sang hră ƀơi hơdôm gưl hrăm.

Ăt amăng mơguah lơ 5/9 mơ̆n, rơbêh 7000 čô čơđai sang hră hăng ƀing nai pơtô ƀơi 29 boh sang hră tơring glông Kon Plong, tơring čar Kon Tum pơphun sa amăng plĕ jơnum mut thun hrăm phrâo. Sa tơlơi lăp đing nao, pơphun ƀơi anih hrăm mông jơnum mut thun hrăm phrâo, ƀing čơđai sang hră arăng lông lăng tơlơi thâo gơñu drơ̆ng glăi hăng pơhlôm kơ tơlơi truh lŏn pơpư̆ čư̆ mơgơi truh. Nai pơtô Lê Văn Đồng, Kơ-iăng Khua anom bruă Pơtô hăng Pơjuăt tơring glông Kon Plong, brơi thâo, pơtong rơđah tơlơi truh lŏn pơpŭ čư̆ mơgơi lĕ sa tơlơi truh lŏn adai ngă tơnap biă mă lăi lui hlâo laih anun amra ngă răm ƀăm prong ƀu dưi thâo ôh, ƀơi anăp kơ thun hrăm phrâo truh thun 2024-2025, anom bruă pơtô hrăm tơring glông hơmâo ngă hrŏm lu sang bruă hơmâo pơtô brơi hơdră pơhlôm hlâo tơlơi truh ječ ameč tơdah hơmâo kiăng ƀing čơđai thâo laih bĕ hĭ tơlơi răm ƀăm hŭi hơmâo lŏn pơpư̆ čư̆ mơgơi ngă.