Ră anai, glăk bơyan không phang pơ-iă hang kơtang hloh ƀơi kual Dap kơdư. Ƀơi să Dak Mil, tơring čar Lâm Đồng, bruă thu khŏt ia jai kơtang tui lơm đang kơphê phrâo pla plih hĭ phun kơsu. Djop đang hmua lêng kơ khuer sa boh ia bơmun, hăng ia mơng atur lŏn anai lĕ ia pruih brơi phun pla. Sang anŏ ơi Triệu Cuối, dŏ amăng ƀut plơi 7, să Dak Mil, hơmâo kơnong 5 ar đang kơphê samơ̆ hơmâo mă yua hơdôm rơtuh klăk prăk pioh kơ khuer ia bơmun pruih brơi phun pla.

Ƀơi să Dak Mil, bruă khuer ia bơmun ƀu djơ̆ kơnong lĕ bruă kiăng ngă đôč ôh mơ̆ ăt lĕ bruă khŏm ngă kiăng phun pla dưi găn rơgao bơyan không phang. Lơm ia amăng dơnao, ƀơi čroh hnoh ƀu dŏ dong tah, ia amăng atur lŏn amra yua phun. Ayong Triệu Khương, mơnuih juăt hyu mă bruă apah brơi ƀing hyu khuer ia bơmun, laih anun ñu blơi măi khuer ia bơmun kiăng yua bơwih ƀong. Samơ̆ truh bơyan phang anai. Mah ƀing hyu khuer ia ăt ƀu dưi ĕp ƀuh ia yua lơi.

“Blung hlâo kâo hyu mă bruă arăng apah samơ̆ ƀu djop ƀong djop huă lơi, laih anun kâo blơi măi khuer ia, pioh khuer ia bơmun brơi sang anŏ hăng hyu khuer brơi neh met wa, hơmâo 30-40 boh ia bơmun laih. Samơ̆ ƀơi anai ia khŏt abih laih, khuer 10 boh, hơmâo truh 6 boh ƀu hơmâo ia. Kar hăng sang anŏ gơmơi tui anun mơn. Ƀô̆p ƀiă mông đôč, ia thu mơtăm”.

Bruă khŏt ia amăng atur lŏn glăk rĭm thun jai ƀuh lu anih ƀơi kual Dap kơdư. Yă Nguyễn Thị Trinh dŏ amăng să Dak Săc, tơring čar Lâm Đồng khŏm sĭ hĭ giăm 3 ektar đang hmua tơdơi kơ khuer 8 boh ia bơmun ăt ƀu djop ia pruih. Sang anŏ ñu nao dŏ pơkŏn, čang rơmang huăi hơmâo lu mơnuih bơrơsua, ia amra lu ƀiă. Samơ̆ rĭm wŏt pơmĭn nao bruă khuer ia, ñu ăt hŭi mơn.

“Sang anŏ ha guai gơmơi ăt hơmâo hmua ƀơi anun, samơ̆ khuer truh 4 boh ia bơmun laih ăt aka ƀu hơmâo ia yua lơi. Ƀơi anun khuer ia bơmun juăt lŏm, anun ta kiăng hơmâo đing pơgăn hŭi lŏm. Truh khuer giong ƀu hơmâo ia, ta ăt khŏm duh prăk kơ arăng mơ̆ đing pơgăn hŭi lŏm ăt ƀu dưi suă đĭ lơi”.

Ƀu djơ̆ kơnong hơdôm kual đang hmua kriang kơdư luh nao khuer ia đôč ôh mơ̆ hơdôm kual ngă hmua pơdai ăt tui anun mơn. Ơi Ngô Văn Sình, dŏ amăng să Ea Rôk, tơring čar Dak Lak brơi thâo, hlâo adih khuer dơlăm kơnong 40 met đôč, truh ră anai khuer truh 140 met, samơ̆ ia yua ăt ƀơƀrĕ đôč.

“Kâo khuer mơng hlâo anun abih tih 7 boh ia bơmun. Blung hlâo kâo khuer kơnong 34 met mơ̆ ƀô̆p ia huăi khŏt ôh. Ră anai sang anŏ hơpă khuer dơlăm, pô anun hơmâo ia. Đa sang anŏ hơmâo khuer 4 boh ia bơmun, mơ̆ khuer truh ia bơmun tal 4 ăt ƀu hơmâo ia, mơ̆ dơlăm 140 met”.

Tui ƀing mơnuih sĭ đing ia hăng măi ƀô̆p ia, bruă luh nao khuer ia bơmun ră anai ăt dŏ ƀuh lu mơn. Pô sang sĭ đing, măi ƀô̆p ia brơi thâo, hơdôm boh măi khuer sô hơđăp ƀu dưi khuer yua dơlăm đơi, anun arăng tuh pơ alin blơi măi khuer hăng hyuh ia, kiăng gự trun kơtang ƀiă.

“Pơhmutu hăng hơdôm boh sang jum dar anai, hlâo anun khuer ia giăm 100 met, ăt glăk yua hơđong. Samơ̆ lơm hơdôm boh sang anŏ ataih mơng anai hơdôm hơpluh met khuer mơng 130 met-140 met, ƀing gơñu ƀu hơmâo ia dong tah. Hăng ră anai đa sang anŏ iâu măi khuer yua hăng hyuh ia, dưi khuer 240 met, ngă kơ ia bơmun jum dar ƀu hơmâo ia yua hăng ia amăng atur lŏn trun jai dơlăm tui”.

Hơdôm rơtuh rơbâo ektar phun pla glăk dŏ tơguăn ia, ngă bruă khuer ia bơmun ƀơi kual Dap kơdư rĭm thun jai dơlăm tui, mơng pơ yŭ 40 met, ră anai dơlăm trun 240 met hăng aka ƀu dŏ glăi ôh. Lơm ia bơmun tơdơi khuer dơlăm ƀiă ia bơmun hlâo anun, ia amăng atur lŏn amra trun tui. Tơlơi ba truh ƀu djơ̆ kơnong ngă lu ia bơmun khŏt, lu đang hmua ƀu hơmâo ia pruih, prăk tuh pơ alin rơngiă abih đôč ôh ăt sa, dua anih gai khuer ñu djơ̆ atur amăng lŏn, pơhŭi kơ bruă amăng kual anai glăk khuer dơlăm đơi. Tơdah bruă khuer ia bơmun ƀu dưi wai lăng, kual Dap kơdư ƀu djơ̆ kơnong dong ƀơi anăp bruă kơƀah ia jai kơtang tui đôč ôh mơ̆ ăt bơdjơ̆ tơlơi pơplih sat mơng atur lŏn dong. /.