Hăng akŏ jơnum “Ƀuôn Ma Thuôt-Anih truh mơ̆ng kơphê rŏng lŏn tơnah” tal jơnum ngui ngă lơphet anai ba glăi boh tŭ yua hăng lu tơlơi kơđŏm, mơak jă đôm amăng pran jua mơnuih ƀôn sang hăng tuai rơnguai. Jơnum ngui tal anai lăi pơthâo 5 tơlơi pơtruh hiăp: djă pioh, anih nao, mut phung, bang bơngač hăng anŏ hiam mơ̆ng jar kmar hăng tơlơi kiăng pơđĭ tui anăn hiam kơphê Ƀuôn Ma Thuôt hing ang; lăi pơthâo gru grua hiam kơphê Ƀuôn Ma Thuôt hăng gơyut gơyâo jar kmar. Amăng hơdôm hrơi jơnum ngui bruă kơphê hơmâo jơnum pơčrong sai sĭ mơdrô hăng jar kmar thun 2023 hơmâo 464 čô khua  pơ ala nao jơnum, amăng anun 86 čô khua pơ ala mơ̆ng jar kmar jing ƀing khua anih jưh pơ ala dêh čar tač rơngiao, khua pơ ala dêh čar arăng ƀơi ƀôn prong amăng Việt Nam rai mơ̆ng lu dêh čar ƀơi rŏng lŏn tơnah. Pơđut tal jơnum hơmâo 10 pok hră kĭ pơkôl hăng dua bơnah plah wah anom bruă sĭ mơdrô hăng ƀing blơi gơnam sĭ mơdrô mơ̆ng dêh čar Khač, Hàn Quốc hăng Việt Nam.

Bơdjơ̆ nao tô jơlan sĭ mơdrô, amăng thun 2023, hơdôm bôh tơring čar amăng kual Dap Kơdư hmâo laih lu tơlơi gir run hăng ba glăi bôh tơhnal lăp djă pioh. Khua tơring čar Lâm Đồng hmâo gum hrŏm, pơphun jơlan hơdră tô nao rai bruă sĭ mơdrô hăng lu tơring čar, ƀôn prong amăng dêh čar; pơtrut gum hrŏm sa dua bruă mă hăng Japan, Hàn Quốc, India. Bôh tơhnal rơđah biă ñu, rơnuč thun 2023, tal por mơ̆ng anom rơdêh por Jeju Ari mơ̆ng tơdron rơdêh por Incheon (Seoul), Hàn Quốc hmâo por tơpă nao pơ̆ tơdron rơdêh por Liên Khương (tơring čar Lâm Đồng), pơsit gru phun kơ tơlơi pok phun klă hiam, kơtưn hloh dong tơlơi pơkĕ hrŏm kơplah wah gong gai tơring čar Lâm Đồng hăng plơi prong jưh jom Seoul lăi ha jăn hăng hơdôm bôh tơring čar, ƀôn prong mơ̆ng Hàn Quốc lăi hrŏm, ngă giăm hloh bruă nao rai kơplah wah 2 anih anom, gal brơi kơ mơnuih ƀôn sang hăng tuai hyu čuă ngui, hrăm bruă hăng tơring čar Lâm Đồng ăt čang rơmang mơn pơjing pran pơtrut phrâo amăng jak iâo tuh pơplai, pơđĭ kyar bơwih ƀong – mơnuih mơnam.