VOV4.Jarai-Ƀơi kual Dap Kơdư, gong gai kơnuk kơna hăng djop sang bruă ăt pơtum pok pơhai ngă tui lu hơdră bong glăi kơthel mrô 4. Mơguah lơ 27/9, tơring čar Kon Tum hơmâo akŏ pơjing 3 grup mă bruă nao pơ hơdôm tơring glông hŭi bơbeč kơtang kơthel pưh nao tal 4 anai, pioh jŭ yap glăi, pel ĕp tong ten. Hơdôm tơring glông ƀơi Kon Tum hơmâo pơtong glăi jơlan kơthel pưh nao lĕ: Đăk Glei, Tu Mrông, Kon Braih hăng Kon Plong. Gong gai kơnuk kơna hăng djop sang bruă brơi pơđuăi mơnuih ƀôn sang đuăi mơ̆ng anih hŭi rơhyưt, lŏn tơhlŏm, ia ling dăo nao dŏ pơ anih hơđong.

Pơpha mơnuih mă bruă ƀơi anih pơtơdu čơtăng apui lơtrik 500 kV Pleiku

pioh bong glăi kơthel mrô 4

Ƀơi Gia Lai, kông ty dăng hrĕ apui lơtrik Gia Lai pok pơhai bruă mă hyu ĕp lăng anih pơkĕ apui lơtrik, hrĕ dăng nao pơ anih ataih djơ̆ jơlan rơbŭ kơthel, anih hŭi lŏn tơhlŏm pioh ngă kjăp hĭ. Ƀơi Dak Lak, tơring čar hơmâo lu dơnao pơkong ia anet prong hloh Dap Kơdư, anun yơh bruă wai lăng bơnư̆ pơkong ia khom đing nao tong ten, pơhlôm bruă mă yua, pok pơhai ia, pơpha jơlan ia rô kiăng huăi ia lip prong. Bơ ƀơi Lâm Đồng hơmâo git gai kông ty wai lăng djop dơnao pơkong ia, sang măi drai apui lơtrik khom ngă djơ̆ tơlơi phiăn pơgang bơnư̆ pơkong ia.

Nay Jek: Pơblang