Tơring čar Gia Lai hơmâo pơphun djop bruă mă bong glăi kơthel 13 Kalmaegi rơnoh pơkă mrô 5, rơnoh hŭi rơhyưt hloh bong glăi tơlơi truh lŏn adai ngă, hăng 16 boh să ter hăng ia rơsĭ, laih anun rơnoh pơkă mrô 4 hăng 42 boh să dŏ glăi amăng kual Ngŏ tơring čar. Him lăng, hlâo kơ truh yang hrơi dong hrơi anai lơ 6/11, tơring čar amra pơdŭ đuăi abih bang 100.000 boh sang anŏ mơnuih ƀôn sang hăng 350.000 čô mơnuih ƀơi anih hŭi rơhyưt, ƀơi ter hang ia rơsĭ, kiăng pơgang rơnuk rơnua sit kơthel pưh nao. Gơnong bruă git gai pơčrâo bruă ƀơi anăp tơring čar Gia Lai dưi pơdong ƀơi An Nhơn, yua kơ ơi Phạm Anh Tuấn-Khua Jơnum min mơnuih ƀôn sang tơring čar Gia Lai, Khua git gai bruă pơgang ană plơi tơring čar pô gơgrong ba ngă khua. Ƀing ding kơna gum hrŏm, hơmâo ƀing ding kơna phun amăng ping gah tơring čar djru krăp lăng hăng git gai amăng mông mă bruă pơhlom, pơgang tơlơi truh sat lŏn adai ngă, pơpha bruă mă ƀơi tơring kah hăng An Nhơn, Hoài Ân, Tây Sơn, Hoài Nhơn, Vĩnh Thạnh, Phù Mỹ hăng hơdôm să kual gah yŭ tơring čar Gia Lai, kiăng pơhlom ba djop tơhan mă bruă djru gum hrŏm ngă bruă “pă bruă sa anih”, amra bong glăi hăng djop tơlơi či hơmâo sit kơthel mrô 13 pưh rai giăm lŏn hang amăng dêh čar.

Đơ đam tơring čar Dak Lak hơmâo 2.555 boh ƀattô hyu mă akan hơdang hăng 10.994 čô mơnuih mă bruă, ră anai lêng kơ đuăi nao pơ hang kơđăp laih; kơnong ƀơi phường Xuân Đài wai lăng 363 boh ƀattô, truh 4 mông tlam lơ 5/11 abih bang kơ pơwot glăi pơ sang laih. Bruă wai lăng hơdôm gruh rông akan hơdang amăng ia rơsĭ ăt glăk ječ ameč hăng 536 gruh, 23.329 grang rông hơdang grông hăng 252 gruh rông kơčung ia rơsĭ; anom bruă bơdjơ̆ nao amăng ƀon lan rơkâo pơgiong bruă pơgang kjăp hlâo kơ 10 mông mơguah lơ 6/11.

Hrŏm hăng anun bruă pơhlôm brơi mơnong ƀong huă hăng gơnam djru brơi hơmâo pok pơhai ječ. Gơnong bruă sĭ mơdrô hơmâo pơgiong bruă prap rơmet gơnam măi mok, gơnam yua, mơnong ƀong huă hăng 400 tơ̆n braih, rơbêh 10.350 kơthung ia, 72.000 kơthung mitôm hăng rơbêh 1.000 gơnam păng, laih dong pơtum pơƀut ƀing čơđai sang hră gưl prong, gơnam măi mok nao djru tơdah kiăng. Git gai ƀơi grup wai lăng, Khua Jơnum min mơnuih ƀôn sang tơring čar Tạ Anh Tuấn rơkâo djop ƀon lan prap pơhlôm hlâo tơlơi sat hloh, wai pơgang rơnuk rơnua brơi mơnuih ƀôn sang.

Ră anai, tơring čar Khánh Hòa hơmâo giăm 7.000 boh ƀattô hyu mă akan hơdang, amăng anun 900 boh hăng 5.700 čô mơnuih mă bruă amăng ia rơsĭ, hơmâo hmư̆ lăi pơthâo glăi kơđap laih. Abih bang 3.400 čơnăng gruh rông akan hơdang hăng rơbêh 100.000 čô mơnuih pô rông akan hơdang pơdơi abih bruă jăng jao, brơi mơnuih mă bruă glăi kơđap pơ hang. Djop dơnao pơkong ia, bơnư̆ akŏ tli, sang măi drai apui lơtrik ăt krăp lăng tong ten, pok pơhai ia tui hăng tơlơi gêh găl amăng mông ia dăo prong, ăt pơhlom tơlơi rơnuk rơnua kơ mơnuih ƀôn sang, plơi pla gah tơkai ia. Tui hăng rơnoh pơkă hlâo mơ̆ng anom bruă krăp lăng ayuh hyiăng hlim hơjan, mơ̆ng lơ 6 truh lơ 8/11, Khánh Hòa amra hơjan kơtang truh kơtang hloh, angin rơbŭ pưh jua kơtang hnơ̆ng 10-12, ia rơsĭ tơdlăk kơtang mơ̆ng 3-5 met pơdlông. Hăng pran jua bruă mă prăp lui hlâo, khut khăt gum pơgôp tong ten, tơring čar akŏ pơdong anŏ pơgang hlâo kơjăp, kiăng plai ƀiă răm ƀăm kơ mơnuih hăng kông ngăn mơnuih ƀôn sang hăng dêh čar.