Sang hră gưl I-gưl II Sa Loong, să Sa Loong, tơring čar Quảng Ngãi ră anai hơmâo 36 anih hrăm hăng rơbêh 1.100 čô čơđai, amăng anun hơmâo 90% lĕ mrô čơđai mơnuih djuai ania ƀiă hơmâo Sêdang, Ca Dong, Jeh-Triêng, Bahnar, Brâu, Êđê, Mường, Tày…Thun hrăm pơ anăp, sang hră amra him lăng amra pok prong đĭ 40 anih hrăm hăng giăm 1.250 čô čơđai sang hră. Sang hră gưl I-gưl II Sa Loong hơmâo ruah man pơdong jing sang hră kơnuk kơna čem rông ba pơlir gưl hrăm, djru brơi ƀing čơđai đơ đam să. Anai lĕ hơdră bruă pơprong, djru brơi ƀing čơđai kual giăm guai hơmâo tơlơi gal kiăng hrăm klă ƀiă dong.

Ơi Nguyễn Hữu Phượng, Khua sang hră gưl I-gưl II Sa Loong brơi thâo, ră anai sang hră hơmâo 70 čô mơnuih apăn bruă, nai pơtô, mơnuih mă bruă. Sang hră hơmâo pơphun pơtô hrăm mơguah hăng tlam amăng hơdôm thun rơgao samơ̆ aka ƀu djop tơlơi gal kiăng brơi čơđai dŏ đŏm glăi yang hrơi. Sang hră glăk gum hrŏm hăng Jơnum min mơnuih ƀôn sang să Sa Loong hăng hơdôm gơnong bruă, anom bruă bơdjơ̆ nao pok prong lŏn mơnai kiăng man pơdong sang hră pơlir gưl hrăm, brơi čơđai dŏ đŏm glăi yang hrơi tui tơlơi pơkă mơng Ding jum pơtô pơjuăt hăng lŏn pioh man pơdong prong ƀiă biă mă ñu 5 ektar.

“Tơdơi kơ lăi pơthâo, mơng lơ 3/11/2025 amra pơphun ngă lơphet pok man pơdong, yua anun hơdôm anom bruă, gơnong bruă, djop gưl glăk ječ ameč pơplih pơkra hăng ba tơbiă tơlơi pơtrun kiăng ngă tui djơ̆ hrơi blan. Ră anai, anih hrăm brơi ƀing čơđai ăt djop mơn; bruă man pơdong phrâo amra pok pơhai ha bơnah lŏn hơmâo dưm dăp, huăi bơdjơ̆ nao kơ bruă pơtô hrăm kơ ƀing čơđai. Abih bang mơnuih čang rơmang hơdră bruă anai tañ pok pơhai kiăng mơnuih ƀôn sang dưi tŭ mă hơdră djru mơng kơnuk kơna brơi kơ kual giăm guai”.

Tui ơi Nguyễn Ngọc Thái, Khua gơnong bruă pơtô pơjuăt tơring čar Quảng Ngãi, ngă tui tơlơi črâo trun mơng Kơnuk kơna, tơring čar Quảng Ngãi hơmâo man pơdong 9 boh sang hră gưl I hăng sang hră gưl II kơnuk kơna čem rông ba ƀơi 9 boh să giăm guai tơring čar. Amăng rơwang tal 1 (thun 2025), tơring čar amra pơphun man pơdong ƀơi 4 boh să hơmâo Dục Nông, Sa Loong, Rờ Kơi hăng Mô Rai; abih tih prăk tuh pơ alin rơbêh 1.000 klai prăk. Ơi Nguyễn Ngọc Thái brơi thâo dong, amăng thun 2025, Kơnuk kơna hơmâo kah pơpha brơi tơring čar 117 klai prăk, mrô dŏ glăi amra jao amăng thun 2026:

“Ră anai glăk hơmâo lu tơlơi gun samơ̆ djop gơnong bruă, sang bruă lêng kơ dong yua. Lăi biă ñu lĕ pioh yua amăng să abih laih, samơ̆ lŏn kăng mă yua gah pơtô pơjuăt ăt aka ƀu jao. Yua anun ră anai kiăng pơplih glăi, pơhrua bruă dưm dăp hiưm pă ñu kiăng jao lŏn, pơphun man pơdong sang hră tañ hloh”.

Tơring čar Lâm Đồng hơmâo 5 boh să giăm guai pơlir anun lĕ Tuy Đức, Quảng Trực, Thuận Hạnh, Thuận An hăng Đắk Wil. 5 boh să anai hơmâo 47 anih pơtô hrăm hăng 39 boh sang hră kơnuk kơna pơdong, 5 boh sang hră mơnuih ƀôn sang pơdong. Amăng anun hơmâo kơnong 1 boh sang hră gưl tlâo kơnuk kơna čem rông ba. Ngă tui tơlơi git gai mơng Jơnum min mơnuih ƀôn sang tơring čar, gơnong bruă pơtô pơjuăt tơring čar Lâm Đồng glăk gum hrŏm hăng djop gơnong bruă hăng gong gai 5 boh să, pok pơhai akŏ bruă pơjing rĭm boh să sa boh sang hră kơnuk kơna čem rông ba pơlir gưl hrăm.

Tui yă Lê Thị Bích Liên-Khua gơnong bruă pơtô pơjuăt tơring čar Lâm Đồng, hơmâo laih 2 boh să giăm guai, anun lĕ să Thuận An hăng Quảng Trực glăk prap lui djop tơlơi gal hăng amra man pơdong amăng thun 2025 mơtăm. Rĭm boh sang hră prong 30 anih hrăm, djop kiăng pơtô brơi giăm 1.000 čô čơđai. Yă Lê Thị Bích Liên hok mơ-ak brơi thâo, hơdôm ring bruă anai čang rơmang amra djru brơi ƀing čơđai kual giăm guai hơmâo anih hrăm, anih dŏ, anih ƀong huă hơđong, pơgôp pơđĭ kyar mơnuih mă bruă hăng hơkrŭ wai pơgang rơnuk rơnua ƀơi kual giăm guai.

“Ƀơi să Quảng Trực hăng Thuận An hơmâo Ding jum pơtô pơjuăt ba pơmut amăng anăn tuh pơ alin, prăk pioh yua lĕ 114 klai prăk hăng rơkâo man pơdong hlâo kơ lơ 19/12/2025. Truh ră anai, să Thuận An hơmâo djop tơlơi gal hăng khul wai lăng akŏ bruă mrô 3 glăk ngă hră pơ-ar kiăng mơ-it nao, gir run rơnuč blan 10 amra giong hăng akŏ blan 11 pơ anăp amra man pơdong. Bơ ƀơi să Quảng Trực glăk pơphun pơhrui glăi lŏn mơnai, gir run rơnuč blan 12 amra man pơdong”.

Ngă tui tơlơi črâo trun mơng Ding jum kơđi čar kơ bruă man pơdong hơdôm boh sang hră ƀơi hơdôm să kual giăm guai, amăng thun anai, Dak Lak amra man pơdong sang hră kơnuk kơna čem rông ba pơlir gưl hrăm hăng abih tih prăk tuh pơ alin rơbêh 390 klai prăk. Hơdôm boh sang hră anai hơmâo man pơdong ƀơi 3 boh să giăm guai hơmâo Ia Lốp, Ia Rvê hăng Buôn Đôn hăng amra pok man pơdong ha amăng plĕ amăng akŏ blan 11 pơ anăp.

Khua git gai Ping gah tơring čar Dak Lak ơi Lương Nguyễn Minh Triết brơi thâo, Ia Lốp lĕ sa amăng 7 boh să ƀu pơmut hrŏm amăng tơring čar, yua dong amăng kual giăm guai, anun ăt hơmâo tơlơi gêh gal mơn, hăng hơmâo lu tơlơi lông yua kual lŏn mơnai prong, mơnuih dŏ raih daih, mrô sang anŏ ƀun rin hăng giăm ƀunrin dŏ lu. Khua git gai Ping gah tơring čar rơkâo ƀon lan kiăng lăng nao tong ten tơlơi gal, pơsir hĭ hơdôm anŏ aka ƀu klă, pơplih tơlơi pơmĭn kiăng pơđĭ kyar hơđong kjăp amăng rơwang phrâo.

“Ăt hăng ƀing mơnuih anai, să anun mơn samơ̆ tơlơi rơkâo kơ bruă mă ră anai ăt glăk lu tui, bruă jao hlâo anun amăng să hơđăp kơnong 197 bruă, mơ̆ ră anai đĭ 1.065 bruă jao. Yua anun kiăng lăng glăi tơlơi glăm ba, pran jua mă bruă mơng ta pô, mơng anun thâo tong ten bruă mă, hơdră pơphun ngă bruă, tơlơi anăp nao hăng tơlơi pơmĭn mơng ta pô. Tơlơi pơmĭn kiăng kơ prong, anăp nao gưl dêh čar hăng amăng bruă mă, ƀon lan hăng ƀing apăn bruă phrâo kiăng ngă tui djơ̆ tơlơi rơkâo pơplih phrâo ră anai”. /.