Ayong Rčom Dun, 30 thun djuai ania Jrai dŏ ƀơi plơi Ngol Rông, să Ia Krêl, tơring glông Đưk Kơ, dưi hơmâo kông ty 74, Binh đoàn 15 iâu mă bruă, ngă kông ñơn reh kơtăk kơsu mơ̆ng akŏ thun anai. Ñu brơi thâo, prăk blan 7 klăk prăk sa blan, anun tơlơi hơdip mơda hơđong ƀiă.

“Hlâo kơ mut ngă kông ñơn lĕ sang anŏ tơnap tap biă mă, ră anai hơmâo sang dŏ, bruă mă hơđong kâo čang rơmang hơđong hloh, tơdơi anai ană bă dưi hrăm hră pơar, kâo bơni kơ kông ty hơmâo djru ba kâo”.

Hăng ayong Ksor Y Đô dŏ pơ să Ia Krêl, tơring glông Đưk Kơ, dưi hơmâo tơlơi djru ba mơ̆ng ƀing khua mua amăng kông ty 75, Binh đoàn 15, truh ră anai, ñu thâo hruaih laih ngă bruă reh kơtăk kơsu arăng jao kơ gơñu pô mă kơtăk:

“Mut mă bruă reh kơtăk kơsu thâo hruaih, hrăm tui lu tơlơi pơtô ba. Hlâo adih aka ƀu hrăm ƀu thâo ôh hơdră reh mă kơtăk kơsu, mut mă bruă hơmâo nai pơtô brơi hơdră reh kơtăk kơsu hiư̆m pă laih anun ƀrư̆ đĭ tui. Laih hơmâo tơlơi pơtô ba ta ƀuh hơđong ƀiă pran jua mă bruă, mut ngă kông ñơn kiăng hơmâo prăk blan pơhrui glăi kơ sang anŏ”.

Hơdôm thun rơgao, Kông ty 74, kông ty 75, gah Binh đoàn 15, dŏ ƀơi tơring glông Đưk Kơ, tơring čar Gia Lai hơmâo pơtô hrăm giăm 2000 čô mơnuih reh kơtăk kơsu jing mơnuih djuai ƀiă soh. Lu sang bruă ngă tui tŭ yua jak iâu, pơtô lăi, djru ba kơ mơnuih ƀôn sang, hăng hơdră brơi ană rơmô (rơmô đai) pioh rông, čung adơi nao sang hră, djru ană amôn čơđai sang hră ƀun rin, ƀơk pơpha ia tơsâo rơmô, djru bruă pơkra jơlan amăng plơi pla, pơdong sang khăp pap, hơdor tơngia, sang gum pơgôp, pơphun mông ngui ngor mơak čơkă thun phrâo juăt lăi ƀong têt, ƀơk gơnam kơ sang anŏ hơmâo anăn kơnuk kơna djru ba abih tih rơnoh prăk hơdôm klai prăk.

Kơnong pơtô bruă mă kơ mơnuih ƀôn sang amăng plơi pla, Đại tá Trịnh Hà Tâm, Khua kông ty 75-Binh Đoàn 15 brơi thâo:

“Kông ty 75 thun anai iâu mă bruă djop laih, abih bang lêng kơ mơnuih ƀôn sang ƀơi plơi pla soh. Lơ̆m pơtô ba ta djru abih gơnam yua hơdră mă bruă laih anun pơčrâo brơi tong ten, kơđiăng biă mă, dơ̆ng mơ̆ng thŏng reh, hơdră djă thŏng, reh kơtăk, mă kơtăk kơsu hiư̆m pă, yua kơ anun ƀing nai pơtô, khua mua amăng kông ty khom nao hrŏm pơčrâo brơi bruă mă  laih anun dŏ hrŏm hăng mơnuih mă bruă”.

Lăi nao kơ tơlơi glăm ba, bruă mă mơ̆ng Binh đoàn 15 amăng bruă djru mơnuih ƀôn sang djuai ƀiă amăng tơring glông, ơi Trần Ngọc Phận, Kơ-iăng khua Jơnum min mơnuih ƀôn sang tơring glông Đưk Kơ, lăi:

“Anom bruă  mơ̆ng Binh đoàn 15 lĕ hơdôm kông ty hơmâo djru kơ tơring glông lu biă mă, tuh pơ alin pơkra jơlan glông, djru apah prăk blan kơ mơnuih ngă kông ñơn, lu kơ mơnuih ƀôn sang djuai ƀiă. Boh nik ñu bruă pơgang rơnuk rơnua hơđong, ngă hrom lu plơi pla, să amăng tơring glông pơtrut bruă mă man pơdong plơi pla phrâo djop kông ty ngă klă soh. Hơdôm tơlơi dưi ngă lĕ kông ty djru kơ tơring glông hmao kru, pơsir bruă mă, pơđĭ prăk pơhrui glaiw kơ mơnuih mă bruă, hơđong tơlơi hơdip mơda”.

Đại tá Khuất Bá Cao, Khua git gai ping gah, Kơ-iăng Khua Binh đoàn 15, brơi thâo, đing nao iâu pơmut mơnuih ƀôn sang djuai ƀiă mut mă bruă, jing sa jơlan hơdră prong mơ̆ng ping gah, khua mua tơhan Binh đoàn 15, kiăng pơtrut bơwih ƀong huă, pơđĭ tui tơlơi hơdip mơda kơ mơnuih ƀon sang, pơgang hơđong bruă kơđi čar, rơnuk rơnua mơnuih mơnam ƀơi kual guai dêh čar:

“Giăm 8000 čô mơnuih ƀôn sang djuai ƀiă mơ̆ng Binh đoàn gơmơi đing nao, pơtrut mă bruă kiăng gleng nao kơ boh tŭ yua hiam klă, brơi jak iâu mơnuih ƀôn sang djuai ƀiă mut ngă kông ñơn amăng djop anih pơphun bruă mă laih anun pơhlôm djop rơnoh prăk pơhrui glăi mơ̆ng bruă mă, kiăng tơlơi hơdip mơda hơđong hăng lu hơdră, lu jơlan  djru ba gơnam yua mă bruă hăng rơdêh đĭ, hơdră mă bruă, pơjeh djuai phun pla, prăk čan. Sơ̆n pran jua djru pơtô lăi, jak iâu mơnuih ƀôn sang mă bruă, ba yua boh thâo ia rơgơi phrâo”.