Jing kual juăt hơmâo na nao tơlơi truh lŏn adai ngă, kah hăng rơbŭ kơthel, ia ling dăo, kual gah Ngŏ Gia Lai, tơring čar Bình Định hơđăp phrâo găn rơgao kơthel tal 13 ngă laih anun ia ling dăo prong rơnuč thun 2025, ngă răm ƀăm kơtang biă mă kơ tơlơi hơdip mơda mơnuih ƀôn sang laih anun bruă ngă hmua bơwih ƀong huă mơ̆ng mơnuih ƀôn sang. Hơdôm rơtuh boh sang dlưh, hơdôm rơbâo boh sang ia lip, hơdôm rơbăn met hang ia krông, ia čroh hnoh anet prong pơčah, ia kor, ia puh pơđuăi, lip abih hmua pơdai, đang añăm pơtam. Ƀơi anăp kơ mông jơnum prong ruah khua ping gah dêh čar tal XIV, yă Huỳnh Khánh Ly, dŏ ƀơi plơi Luật Lễ, să Tuy Phước Đông, tơring čar Gia Lai, rơkâo tui anai:

“Jơnum ruah khua ping gah dêh čar tal anai, mơnuih ƀôn sang amăng kual čang rơmang hơmâo Kơnuk kơna djru ba dơ̆ng ƀơi anih lŏn dăo plung dơnung, juăt ia lip. Jum dar lêng kơ ia krông, ia ania guang dar abih. Mơnuih ƀôn sang kiăng hơmâo akŏ tli, hang ia dưi man bư̆ bor kơjăp, klă hloh, jơlan glông nao rai, tơdrông tua djop, ngă gêh găl brơi mơnuih ƀôn sang rô nao rai bơwih ƀong huă pơđĭ kyar hloh”.

Ăt hrŏm tơlơi kiăng hnun mơ̆n, ơi Nguyễn Thanh Dũng, Khua anom bruă ngă hrŏm đang hmua Phước Thuận, Gia Lai brơi thâo, anŏ khom jŭ yap kơ bruă čuk pơkra jơlan glông atur tơlơi rô nao rai sa bruă phun yom biă mă hăng kual ia ling dăo juăt hơmâo.

“Kual ia ling dăo juăt hơmâo na nao anun yơh tơlơi kiăng ia rô đuăi tañ, hrŏ hmar dŏ tơnap tap biă mă. Jơlan glông nao rai, bơnư̆ akŏ tli čang rơmang kơnuk kơna đing nao lu hloh: mơta sa lĕ tuh pơ alin čuk pơkra jơlan, tơdrông tua, dua lĕ bơnư̆ pơkong ia, akŏ tli, anih pơđoh đuăi ia hrŏ tañ sit bơyan ia lip”.

Anăp nao kơ jơnum prong ruah khua ping gah dêh čar tal XIV, yă Tô Thị Thu Hường, Kơ-iăng khua git gai ping gah phường Quy Nhơn, đăo kơnang biă mă kơ bruă pơblih phrâo pơgang anŏ mơtah mơda, jơlan hơdră mơ̆ ping gah hlăk git gai ngă tui, amra dưi ngă djơ̆ anŏ či kiăng mơ̆ng mơnuih ƀôn sang, kơ atur kơjăp ngă bruă pơđĭ kyar hơđong ƀơi anăp kơ lu tơlơi či truh yua ayuh hyiăng lŏn tơnah pơblih hmar. Hrŏm hăng anun, lu jơlan hơdră prong sa amăng plĕ mơ̆ng tal jơnum ruah khua ping gah anai, amra ba lŏn ia ta pơđĭ kyar hmar hloh amăng črăn phrâo pơ anăp. Gah anom bruă ping gah phường, ăt gir run bơkơtưn mă bruă kiăng čơkă mơak tal jơnum ruah khua ping gah đơ đam dêh čar:

“Tơdơi kơ lu tơlơi răm ƀăm yua kơthel ngă, Quy Nhơn hlăk rŭ glăi anăp nao mơak čơkă jơnum prong ruah khua ping gah đơ đam dêh čar tal XIV. Amăng hrơi mông mơak prong, djop anih ƀhêm ƀham ia mriah hla gru hăng ia mơtah kyâo pơtâo lŏn glai hơmâo pơjing rai anŏ hiam phara biă mă, prăp lui ngă tui tŭ yua hloh djop bruă mă pơtrun hăng jao ngă. Mơnuih ƀôn sang phường Quy Nhơn hlăk anăp nao kơ Jơnum prong ruah khua ping gah hăng tơlơi đăo kơnang čang rơmang tong ten biă mă kơ anăp ngă bruă yom phrâo mơ̆ng Ping gah”.

Ta dưi ƀuh sit, mơ̆ng bruă ngă tom găn rơgao tơnap tap amăng kual ia ling dăo prong gah Ngŏ Gia Lai, hơdôm tơlơi rơkâo, tơlơi čang rơmang mơ̆ng mơnuih ƀôn sang laih anun djop sang bruă lêng pơtum nao, kiăng rơkâo bruă čuk pơkra jơlan, man pơdong atur kơjăp, djơ̆ găl hăng anŏ pơblih ayuh hyiăng laih anun dưi bong glăi hăng tơlơi truh lŏn adai ngă ngă. Anăp nao jơnum ruah khua ping gah đơ đam dêh čar tal XIV, tơlơi đăo kơnang hăng anŏ či kiăng prong mơ̆ng mơnuih ƀôn sang dưi mơ-it nao kơ hơdôm tơlơi pơtrun tong ten, sui thun, lăng kơ ană mơnuih ngă anŏ phun, đing nao pơgang rơnuk rơnua, pok brơi jơlan hơdră bơwih ƀong huă hăng pơđĭ kyar kơjăp hơđong kơñ pơgi ni anăp.