Ƀơi anom mă bruă plơi Phan Dũng, să Tuy Phong ƀơi kơƀang tĕp lăi pơthâo anăn mơnuih ƀôn sang ruah khua hăng ƀing tơbiă anăn ruah Khua pơ ala mơnuih ƀôn sang dêh čar tal XVI hăng Jơnum min pơ ala mơnuih ƀôn sang djop gưl rơwang thun 2026-2031 lêng kơ hơmâo lu mơnuih nao pơđok. Ơi Mang Nhu, djuai ania Raglai dŏ amăng plơi Phan Dũng brơi thâo, hơdôm hrơi anai ƀing apăn bruă nao tơl hơdôm boh sang anŏ kiăng kơ lăi pơthâo kơ hrơi plĕ hră, pơtă pơtăn neh met wa nao ĕp lăng ƀing mơnuih tơbiă anăn hăng ĕp lăng anăn mơnuih ƀôn sang ruah khua, prap nao plĕ hră.

“Rĭm čô mơnuih dưi ruah mă ƀing khua mua, yua anun plĕ hră brơi kơ djơ̆ tơlơi pơkă, djơ̆ mơnuih kiăng. Jing sang čô mơnuih ƀôn sang ruah khua hlơi hlơi lêng kơ čang rơmang ƀing khua mua hơmâo ruah đĭ amra đing nao lu ƀiă dong tơlơi čang rơmang mơng mơnuih ƀôn sang, đing nao kiăng tơlơi hơdip jai trơi pơđao, yâo mơ-ak. Kâo ƀuh neh met wa hlơi hlơi lêng kơ hok kơdok, pơsur ƀing ană tơčô truh 18 thun pơ glông kiăng nao plĕ hră ruah khua mua”.

Ơi Mang Hiếu, Khua plơi Phan Dũng brơi thâo, plơi Phan Dũng hơmâo lu mơnuih djuai ania Raglai, dong amăng anih plĕ hră mrô 5 să Tuy Phong, tơring čar Lâm Đồng, plơi pla hơmâo 663 čô mơnuih ƀôn sang ruah khua hăng mơnuih ƀôn sang hơmâo arăng lăi pơthâo kơ hrơi plĕ hră ruah khua mua.

“Kiăng kơ mơnuih ƀôn sang hluh rơđah ƀiă dong lơ 15/3 lĕ hrơi abih bang mơnuih nao plĕ hră, ră anai amăng plơi ăt gum hrŏm hăng jơnum min djop djuai ania mơnuih mơnam kiăng pơblang brơi amăng grup Zalo kah hăng amăng fanpage mơng Khul mơnuih ngă hmua. Mơng anun kiăng pơblang brơi neh met wa hluh rơđah hrơi anai lĕ hrơi nao plĕ hră, kiăng pơdah tơlơi kiăng, tơlơi čang rơmang mơng ta pô hăng ƀing tơbiă anăn ngă khua”.

Ƀơi să Bắc Bình, tơring čar Lâm Đồng, bruă prap lui hrơi jơnum ngui prong ăt hơmâo pơgiong laih. Rơbat hyu djop plơi pla djuai ania Chăm amăng să Bắc Bình, pơ hơpă lêng kơ hmư̆ loa lăi pơthâo tal plĕ hră ruah khua. Ƀu djơ̆ kơnong pơtô pơblang amăng loa đôč ôh, hơdôm grup plĕ hră ăt nao gum hrŏm hăng mơnuih arăng đăo gơnang, ƀing kŏm drơi jăn tui đăo amăng plơi pla djuai ania Chăm nao tơl rĭm boh sang anŏ kiăng pơtrut pơsur, pơblang brơi neh met wa hluh rơđah kơ hrơi plĕ hră anai. Ơi phơ̆t Huỳnh Cứng, sa čô mơnuih kŏm drơi jăn tui đăo djuai ania Chăm amăng plơi Bình Tiến, să Bắc Bình brơi thâo: mơng bruă pơtô pơblang, neh met wa djuai ania Chăm hluh rơđah dong kơ hrơi plĕ hră ƀu djơ̆ kơnong lĕ tơlơi dưi đôč ôh mơ̆ ăt lĕ tơlơi glăm ba mơng rĭm čô mơnuih ƀôn sang ruah khua. Mơng anun, ngă lar hyu pran hok mơ-ak, đăo gơnang kiăng hrơi plĕ hră-lơ 15/3 pơ anăp jing hrơi jơnum ngui prong amăng abih bang mơnuih.

“Hơdôm hrơi rơgao amăng plơi pla hơmâo pơblang rơđah kơ tal plĕ hră ruah khua mua, rôk jơlan hơmâo yôl ƀăng rôn, tơlơi pơtrut pơsur, hla kơ kiăng mut hrŏm hrơi plĕ hră ruah khua mua. Kâo pô lĕ sa čô mơnuih kŏm drơi jăn tui đăo, kâo ăt pơblang brơi mơn, blung hlâo lĕ mơnuih jum dar truh hrơi anai kiăng nao plĕ hră hăng ruah ƀing hơmâo hơdip hiam, thâo rơgơi, kiăng tơdơi anai lơm đĭ ngă khua amra ngă tui djơ̆ tơlơi ƀuăn mơng ƀing gơñu, mơng anun dưi pơgôp brơi plơi pla ala ƀon”.

Yă Nguyễn Thị Vân Khánh, kơ-iăng Khua git gai Ping gah, Khua jơnum min plĕ hră ruah khua să Bắc Bình brơi thâo, đơ đam să hơmâo rơbêh 36.400 čô mơnuih ƀôn sang ruah khua. Kiăng kơ prap lui tal plĕ hră ruah Khua pơ ala mơnuih ƀôn sang dêh čar tal XVI hăng Jơnum min pơ ala mơnuih ƀôn sang djop gưl rơwang thun 2026-2031, gong gai să hơmâo ječ ameč pok pơhai ha amăng plĕ hơdôm bruă jao hăng pran gir run hloh, sit biă ñu amăng bruă pơtô pơblang.

“bruă pơblang brơi kiăng đing nao, sit biă ñu lĕ amăng kual mơnuih djuai ania ƀiă. Hăng tui anun, ƀing gơmơi hơmâo pơlir bruă pôr pơhing kiăng lăi pơthâo hăng pơlăi nao rai hơdôm bruă bơdjơ̆ nao bruă plĕ hră ruah khua. Tui tơlơi git gai mơng gưl glông ƀing gơmơi ăt pơhlôm djơ̆ tơlơi pơkă hrŏm, ngă tui hơdôm boh tơhnal bơdjơ̆ nao bruă plĕ hră. Hăng ƀing gơmơi đăo gơnang lơ 15/3 jing hrơi jơnum ngui amăng abih bang mơnuih”.

Kar kăi ƀơi să Bắc Bình, să Tuy Phong phrâo akŏ pơjing hơmâo kual lŏn mơnai pơprong, mơnuih dŏ hơdip raih daih, tơlơi hơdip dŏ lu tơnap tap, rơkâo bruă prap lui plĕ hră kiăng ngă tui tong ten. Ơi Trần Di Hậu, kơ-iăng Khua Jơnum min mơnuih ƀôn sang să Tuy Phong, tơring čar Lâm Đồng brơi thâo, abih bang mơnuih ƀôn sang ruah khua ƀơi să lĕ 6.616 čô amăng 9.751 čô mơnuih.  Amăng să hơmâo 2 kual plĕ hră hơmâo lu mơnuih djuai ania ƀiă anun lĕ plơi Phan Dũng hăng Tuy Tịnh 2. Truh ră anai, bruă pơtô pơblang brơi hơmâo să ngă tui lu hơdră lăp djơ̆ hloh.

“Tơdơi kơ tŭ mă hră čih anăn ƀing tơbiă anăn ruah ngă khua, să ăt hơmâo git gai pơjing črăn hơdră pơblang brơi tơlơi pơhing kơ rĭm čô mơnuih tơbiă anăn amăng loa pôr pơhing, laih dong amăng fanpage. Hăng mơng anai truh hrơi tơjuh ƀơi hơdôm anih hơmâo lu mơnuih anun lĕ: Sang hră, sang čơ amra hơmâo kơƀang lăi pơthâo hăng hơdôm pa-nô kiăng neh met wa thâo rơđah dong kơ tơlơi yôm mơng tal plĕ hră anai”.

Hơdôm mông pơbưp mơnuih ƀôn sang ruah khua hăng mơnuih tơbiă anăn, hơdôm tơlơi pơblang brơi hrơi plĕ hră, loa pôr pơhing hmư̆ rĭm hrơi…abih bang glăk ba glăi hrơi mông hok kơdok mơ-ak hlâo kơ hrơi plĕ hră ƀơi kual mơnuih djuai ania Chăm, Raglai./.