VOV4.Jarai - Lơ 26/9, Khua Ding jum đang hmua hăng pơđĭ kyar ƀôn lan dêh čar ta ơi Lê Minh Hoan, Kơ-iăng Khua grŭp črâo ba bruă pơgang, pơgăn ayuh hyiăng ƀu klă ngă dêh čar ta hrom hăng Grŭp hyu mă bruă hmâo pel ĕp bruă bŏng glăi hăng kơthel tal 4 ƀơi tơring čar Quảng Ngãi hăng pel ep pơhlôm dơnao kŏng ia Phú Ninh, tơring čar Quảng Nam.

Khua Ding jum ơi Lê Minh Hoan pel ĕp bruă bŏng glăi kơthel tal 4 ƀơi Quảng Nam

Ơi Lê Minh Hoan hmâo hyu lăng laih bơnư̆ pơgang lŏn tơhlom Cửa Đại, plơi prong Hội An, tơring čar Quảng Nam hăng hmư̆ tơlơi lăi pơthâo glăi bruă bŏng glăi hăng kơthel mơng tơring čar Quảng Nam. Ơi Lê Minh Hoan pơsit yôm tơlơi gơgrong hlâo bŏng glăi mơng tơring čar Quảng Nam, Quảng Ngãi. Tui hăng Khua Ding jum, hơdôm bôh tơring čar anai leng kơ hmâo dua kual khom bŏng glăi hăng kơthel, anun lĕ ia rơsĭ khom hyu hơduah ĕp lăng dưm dăp ƀat tô, ba đuăi mơnuih hyu mă akan; bơ̆ kual čư̆ siăng khom pơhlôm hlâo pioh bŏng glăi huĭ hmâo tơlơi truh ia krông čroh hnoh đĭ prong, lŏn tơhlom čư̆ tơglưh.

Tlam lơ 26/9, Khua mua ping gah tơring čar Kon Tum jơnum ječ ameč djop sang bruă ping gah pơyŭ, gong gai kơnuk kơna mơ̆ng tơring čar trun pơyŭ să kiăng ngă tui tơlơi git gai bong glăi hăng kơthel hlim hơjan. Tui hăng anun, khua mua ping gah tơring čar tŭ ư hăng tơlơi rơkâo mơ̆ng Gơnong bruă Pơtô hăng Pơjuăt brơi čơđai sang hră pơdơi hrăm hră mơ̆ng lơ 27/9 truh kơ hơmâo tơlơi lăi pơthâo phrâo pơkŏn. Jơnum min mơnuih ƀôn sang tơring čar akŏ pơjing 3 grup mă bruă hyu pel ĕp, git gai, pơhlôm pơgang kơthel ƀơi djop tơring glông hŭi bơbeč truh yua kơthel  ngă, kah hăng: Kon Plong, Kon Braih, Ngọc Hồi, Đak Tô, Đak Hà, Tu Mrông hăng Đak Glei.

Kon Tum jơnum ječ ameč, pơhlôm, pơgang anŏ răm ƀăm kơthel tal 4 ngă

Khua mua git gai ping gah tơring čar Kon Tum pơtrun hiăp djop anom bruă ping gah, gong gai kơnuk kơna khom ngă tui hơdră pơđuăi mơnuih ƀôn sang amăng anih lŏn tơhlom, ia ling dăo, khut khăt ƀu brơi mơnuih ƀôn sang dŏ glăi ƀơi anih hŭi rơhyưt kơthel pưh nao, hơjăn hlim ia ling dăo prong ngă.

Siu H’Prăk-Nay Jek: Pơblang