Mơ̆ng anun, Ding jum Man pơdong lăi glăi brơi kơsem min tong ten kơčăo bruă, kiăng ngă djơ̆ tơlơi phiăn pơtrun gah tơlơi dưi hăng rơnoh prăk Kơnuk kơna djru hrŏm. Ƀơi hră čih kơsem min tuh pơ alin čuk pơkra jơlan rơdêh đuăi hmar mơ̆ng Plei Ku truh pơ Ƀuôn Ma Thuôt laih anun hlong truh pơ Gia Nghĩa tui hơdră tuh pơ alin sang bruă mơnuih ƀôn sang ngă pô hăng kơnuk kơna djru hrŏm, mơ-it kơ sang bruă Group Đức Long Gia Lai, Ding jum Man pơdong brơi thâo: kơčăo bruă anai prong, jơlan găn nao pơ lu tơring čar, plơi pla hăng mă yua prăk kơnuk kơna. Yua kơ anun, Ding jum Man pơdong lăi, bruă kơsem min tuh pơ alin kiăng ngă tui djop tong ten akŏ klôn, jơlan hơdră tui Tơlơi phiăn Tuh pơ alin ngă hrŏm plah wah sang bruă mơnuih ƀôn sang ngă pô hăng kơnuk kơna gum hrŏm, hơmâo pơtô brơi tong ten ră anai.

Ding jum Man pơdong rơkâo Group Đức Long Gia Lai mă bruă hăng Jơnum min mơnuih ƀôn sang tơring čar Gia Lai, Dak Lak hăng Lâm Đồng pioh pok pơhai brơi djơ̆ hơdră, akŏ klôn. Ding jum Man pơdong amra pơtô brơi hơdră ngă hră pơar tŏ tui tơdơi kơ tŭ mă  hră rơkâo sit nik hăng hơmâo tơlơi tŭ ư mơ̆ng hơdôm tơring čar hơmâo jơlan anai găn nao.