Bruă Khul git gai akŏ pơjing grup krăo lăng kiăng sem lăng boh than pok pơhai tơlơi pơtrun mrô 71, kơ bruă pơtô hrăm pơplih phrâo, amăng anun đing nao ngă rơđah 4 bruă pơprong anun lĕ: Jơlan hơdră pơtô hrăm phrâo; hơdrôm hră; gơnam măi mok yua hăng dưm dăp anih anom, ƀing nai pơtô.

Đĭ pơhiăp amăng mông jơnum, ơi Trịnh Văn Quyết, Khua anom pơtô bruă Ping gah, Khua grup krăo lăng rơkâo bruă kiăo tui lăng kiăng “lăi tơpă, lăi djơ̆, sem lăng djơ̆”, ngă brơi truh anih, yua “rĭm pok hră hrăm, rĭm anih hrăm, rĭm čô mơnuih lêng pơlir hăng tơlơi pơglăi kơñ pơgi kơ hơdôm hơpluh klăk čơđai hăng tơlơi đăo gơnang mơng hơdôm hơpluh klăk sang anŏ”. Mơng anun, pơgôp ba bruă pơtô hrăm hơđong hruaih, hrưn đĭ klă, amra jing atur phun brơi pơđĭ kyar tañ hăng hơđong kjăp amăng lŏn ia.