Pơhiăp amăng mông Jơnum lăi pơthâo Kual pơkă tơring čar Kon Tum rơwang 2021-2030, tơhnal lăng nao truh thun 2050, Kơ-iăng Khua dêh čar ta Trần Hồng Hà lăi rơđah, Kual pơkă tơring čar Kon Tum dưi ba tơbiă amăng abih bang pơđĭ kyar kual Dap Kơdư, tô nao rai hăng kual ia rơsĭ Tŏng Krah dêh čar hăng kual Mê Kông.

Kual pơkă amra jing anih anom djơ̆ phiăn pok tơbiă anô̆ gal, anih anom pơđĭ kyar phrâo kơ tơring čar Kon Tum hăng 4 anih phun, anun lĕ: Pơjing kual pla phun jrao phun mơ̆ng lŏn ia; pơđĭ kyar hơdră mă yua măi mok yôm, măi mok pơkra gơnam; pơđĭ kyar apui yua pơkra glăi hăng tuai čuă lăng mơ̆ng tơring čar Kon Tum amra jing bruă ba jơlan hlâo. Tơhnal pơkă pơđĭ kyar hmâo ba tơbiă lĕ truh thun 2030, tơring čar Kon Tum jing tơring čar pơđĭ kyar tañ, pơhlôm abih bang, kơjăp phik hăng dưm kơnar hluai tui bruă bơwih ƀong hơdjă mơtah, pơhlôm akô̆ tlôn hmâo lu gru grua bôh thâo djuai ania./.