Rơwang bruă pơkra glăi, pok prong jơlan čun čue Prenn Đà Lạt lĕ ring bruă jơlan nao rai gưl III kual čư̆ siăng, hmâo rơwang ataih 7,4 km, hmâo 4 glông jơlan rơdêh đuăi, tur jơlan prong 15,5 m hăng jơlan rơdêh đuăi 14,5m, prong lu hloh 2 wot bơhmu hăng hlâo.

Rơwang bruă hmâo abih bang prăk mă yua pơkra rơbêh kơ 550 klai prăk mơ̆ng ngăn drăp tơring čar, yua kơ Grŭp wai lăng rơwang bruă jơlan nao rai tơring čar Lâm Đồng ngă pô tuh pơplai, Grŭp jơlan čun čue lĕ anom dưi ruah pơkra jơlan. Ră anai pô gơgrong pơkra glăk iâo pơhrui hơdôm rơtuh čô mơnuih hrŏm hăng lu măi mok gơnam mă yua, pơphun pơkra 3 tal kiăng pơtrut tañ rơnoh man pơkra. Hrưn đĭ pơkra giong, mă yua jơlan yôm phăn anai hlâo kơ lơ 28/12, hmao yua nao rai kơ mơnuih ƀôn sang hăng tuai čuă ngui amăng tal Tết Prang 2024./.