Kiăng pok pơhai ngă tui Glông čih pioh bruă akan hăng Čih pioh blơi sĭ, pơgiăng hyu akan amăng glông điện tử tŭ yua sit nik tui hăng tơlơi git gai mơ̆ng Khua dêh čar, Khua jơnum min mơnuih ƀôn sang tơring čar Lâm Đồng ơi Hồ Văn Mười jao kơ Gơnong bruă hmua hăng ayuh hyiăng pơtô brơi, ngă hrŏm hăng gơnong bruă, gong gai bơdjơ̆ nao, ngă ha wơ̆t mơtăm lu tơlơi.

Khua jơnum min mơnuih ƀôn sang tơring čar Lâm Đồng ăt jao kơ Gơnong bruă hmua hăng ayuh hyiăng pơphô bruă čih pơkra Tơlơi pơkă wai lăng, mă yua glông čih pioh bruă mă akan hơdang hăng čih pioh bruă blơi sĭ, pơgiăng hyu tui glông điện tử ƀơi tơring čar, ngă giong hlâo lơ 31/3/2026. Hrŏm hăng tơlơi pơtrun čih pioh bruă mă akan amăng glông điện tử, Lâm Đồng glăk pok pơhai ngă khut khăt, ha amăng plĕ lu hơdră kiăng hrŏm hăng hơdôm boh tơring čar, ƀôn prong hơmâo ia rơsĭ lui hĭ “hră kŏm kơñĭ” IUU, anăp nao đĭ kyar bruă bơwih ƀong mơ̆ng akan hơdang hơđong kjăp, glăm bruă hăng djơ̆ tui tơlơi phiăn jar kmar./.