Ƀơi mông Jơnum, Khul khua git gai tơhan tơring čar lăi pơthâo hơdôm tơlơi pơtrun mơ̆ng Khua ding jum ling tơhan hăng Anom bruă phun pơphô bruă tơhan kơ bruă pơphun glăi, ba tơbiă hră ngă bruă, mơnuih ngă bruă sit nik amăng Khul khua git gai tơhan să; laih dong pơkiăo nao, ruah pơhrua 124 čô tơhan ngă Khua Anom bruă git gai tơhan mơ̆ng 124 boh să phường, kual wai lăng phara hăng giăm 500 čô tơhan hơmâo ruah ngă Kơ-iăng khua git gai grup tơhan, khua apăn bruă Kơđi čar, khua djru bruă, mơnuih mă bruă.

Bruă pơplih glăi anom bruă, mrô mơnuih ngă bruă jing bruă khŏm ngă ƀơ̆i yơh amăng mông akŏ pơdong gong gai dua gưl, kiăng akŏ pơdong khul tơhan mă bruă hơdeč, tŭ yua, jê̆ giăm plơi pla. Laih dong kiăng ƀing khua hơmâo ruah đĭ tañ hơđong anih mă bruă, pơphô bruă, djru ngă hơđong lŏn ia, rơnuk rơnua plơi pla./.