VOV4.Jarai - Tơring čar Gia Lai hơmâo ngă hăng glăk pok pơhai hơdôm hơdră bruă ječ kiăng pơhlôm hlâo kơthel mrô 4. Sa amăng hơdôm bruă jao sit nik hơmâo plơi prong Pleiku pok pơhai anun lĕ hyu pơagaih king ia, trơ̆i hĭ than kyâo amăng plơi prong kiăng huăi ngă ia dŏng hăng phun kyâo joh lơ̆m kơthel pưh nao. Kiăng hmao tlôn pơhlôm hlâo kơthel mrô 4, amăng hơdôm hrơi laih rơgao hăng truh tlam lơ 27/9, Anom bruă wai lăng plơi prong Pleiku gum hrŏm hăng Kông tin TNHH sa ding kơna wai lăng ring bruă amăng plơi prong Pleiku pơphun hyu trơ̆i hĭ hơdôm rơbâo than kyâo djop mơta, anun lĕ kyâo xà cừ, bằng lăng hăng hơdôm phun kyâo pơkŏn than rah hyu, ƀơi jơlan Lê Hồng Phong, Lê Duẩn, Phan Bội Châu. Hrŏm hăng anun, hơdôm anom bruă, khul grup hyu rơmet pơagaih ƀơi hơdôm ară ia krông čroh hnoh amăng plơi prong.

Tui hăng tơlơi lăi lui hlâo mơng Anom bruă pơkă hlâo ayuh hyiăng lŏn adai Lâm Đồng, yua bơbeč djơ̆ mơng kơthel mrô 4, amăng 48 mông truh 72 mông pơ anăp, tơring čar Lâm Đồng hơmâo hơjan găp ƀrô truh kơ hơjan prong, lu anih amra hơmâo ia dăo, ia kuor, lŏn tơhlŏm. Bruă pơgang tơlơi truh lŏn adai ngă, pơgang kơthel mrô 4 glăk hơmâo mơnuih apăn bruă tơring čar Lâm Đồng pok pơhai.

Tui hăng tơlơi lăi lui hlâo, kơthel mrô 4 ƀu mut nao pơ tơring čar Lâm Đồng ôh, samơ̆ yua kơthel ñu pưh kơtang, glông kơthel pưh nao prong mơn anun jing tơring čar anai ăt hơmâo hơjan prong hăng angin kơtang mơn, amuñ hơmâo ia dăo, ia kuor, lŏn tơhlŏm mơn. Yua hnun, Anom bruă pơgang tơlơi truh lŏn adai ngă hăng djru mơnuih bưp tơlơi truh tơring čar Lâm Đồng git gai hơdôm boh tơring glông, plơi prong, hơdôm anom bruă ječ ameč pơgang kơthel, khŏm răng kơđiăng, ƀu dưi ngă amưng ôh.

VOV Tây Nguyên

Siu Đoan - Siu H’Mai: Pơblang