Tơdơi kơ ha blan pơphun ngă bruă Quang Trung, hơdeč hmar man pơdong, pơkra glăi sang dŏ kơ mơnuih ƀôn sang bưp tơlơi truh rơngiă sang dŏ yua kơthel, ia dăo ngă, truh lơ 29/12/2025, tơring čar Lâm Đồng hơmâo man pơdong giong 9 boh sang phrâo. Kơ 29 boh sang kiăng man phrâo dŏ glăi dong, ră anai tơhan blah ngă, tơhan kông an, khul grup amăng plơi pla glăk gir ngă đah mơ̆ng tañ giong. Truh lơ 31/12/2025, amra hơmâo thim 4 boh sang dong hơmâo man giong hăng 25 boh sang dŏ glăi tơring čar Lâm Đồng glăk gir ngă tañ đah mơ̆ng giong hlâo lơ 15/1/2026. Kiăng hơdôm boh sang hơmâo man phrâo hăng pơkra glăi kơ mơnuih ƀôn sang tơdơi kơ hơjan kơthel kjăp hloh, tơring čar Lâm Đồng iâu pơthưr djŏp khul grup djru ba hrơi mă bruă hăng gơnam juăt kiăng man sang.

Truh ră anai, tơring Gia Lai hơmâo pơgiong bruă man pơdong 456/674 boh sang, dưm dưm 67,66%. Sit biă ñu, yap truh lơ 28/12, tơring čar Gia Lai hơmâo pơgiong bruă pơkra ming 27.501/27.522 boh sang răm rai, dưm dưm 99,92%. Ră anai ăt dŏ 21 boh sang kiăng pơkra ming, glăk amăng hrơi mông pơkra giong, him lăng amra pơgiong hlâo lơ 31/12/2025. Hăng bruă man pơdong sang phrâo, tơring čar Gia Lai hơmâo man pơdong abih 674 boh sang glưh răm rai kơtang. Truh ră anai, 456 boh sang hơmâo pơgiong; 218 boh sang ăt glăk đing nao bruă man pơdong.

Tơring čar ba tơbiă hơnong pơkă gir run jao brơi mơnuih ƀôn sang hlâo kơ lơ 25/1/2026. Hrŏm hăng bruă pơkiăo nao mơnuih, tơring čar Gia lai hơmâo mă yua rơbêh 720 klai prăk mơng ngăn drăp kơnuk kơna hăng hơdôm rơnoh prăk pơgôp hrŏm kiăng djru brơi tơlơi hơdip mơnuih mơnam, rŭ pơdong glăi anŏ răm rai hăng man pơdong glăi plơi pla phrâo.