Tơring čar Lâm Đồng hơmâo đơ đam lŏn prong rơhaih hloh amăng dêh čar truh 24.200 km karê, anun kiăng hơmâo jơlan glông nao rai dưi pơtruh, tơkuh hrŏm amăng rơnuk phrâo sa bruă mă ječ ameč biă mă.

Hrŏm hăng bruă čuk pơkra glăi, pơhiam tui jơlan tơring čar, jơlan dêh čar, jơlan rơdêh treng, tơdron rơdêh por hlăk hơmâo ră anai, amăng thun 2025, tơring čar hơmâo pơphun lu bruă mă phrâo, čuk pơkra jơlan rơdêh đuăi hmar mơ̆ng Đà Lạt nao pơ Gia Nghĩa truh pơ ƀôn prong Hồ Chí Minh, lu arăt jơlan nao rai phun amăng 3 kual: Đà Lạt, Gia Nghĩa hăng Phan Thiết. Tơlơi mơ̆ lăp čih pioh lĕ gong gai kơnuk kơna hăng mơnuih ƀôn sang ƀơi Lâm Đồng lêng kơ gum hrŏm sa pran jua ngă tui tơlơi kiăng, anŏ čang rơmang pơkra jơlan prong, rơhaih pioh pơtrut pơđĭ kyar. Kah hăng ƀơi să Phúc Thọ Lâm Hà, mơ̆ng ƀing ba gru hlâo, mơnuih ping gah plơi Tân Hợp, giăm 100 boh sang anŏ mơnuih ƀôn sang amăng plơi ngă hrŏm pơyơr 23.000 met karê lŏn sang đang kơphê brơi gong gai kơnuk kơna pok jơlan prong 28 pơtruh nao rai hăng jơlan 725.