Kơ bruă lŏn tơhroh ƀuh ƀơi hơdôm ară jơlan čun čoe D’ran hăng Gia Bắc, Jơnum min mơnuih ƀôn sang tơring čar Lâm Đồng hơmâo pơsit lăi pơthâo kơ hơdră bruă ječ pơhlôm hlâo hơjan kơthel hăng hơdôm ară jơlan mrô 20 hăng 28. Gong gai ƀon lan pok pơhai ha amăng plĕ lu hơdră pơgang, pơdong kơƀang kiăng lăi pơthâo anih hŭi rơhyưt, kŏm ƀơi brơi mơnuih mut nao hơdôm kual lŏn tơhroh, pơphun ba đuăi mơnuih ƀôn sang nao pơ anih rơnuk rơnua. Anom bruă bơdjơ̆ nao pơkiăo nao mơnuih dŏ gak tơhrơi mlăm kiăng kiăo tui lăng, thâo tong ten tơlơi ba truh hăng ba tơbiă hơdră pơsir hĭ sui pơ anăp. Hơdôm tal hơjan kơtang rơgao ngă lŏn dua bơnah jơlan čun čoe D’ran hăng Gia Bắc tơhroh trun, ngă rơdêh ƀu dưi nao rai. Jơnum min mơnuih ƀôn sang tơring čar rơkâo hơdôm anom bruă bơdjơ̆ nao ječ ameč kuăi rơmet, pơhlôm rơnuk rơnua brơi mơnuih hăng rơdêh, anăm brơi ƀuh lŏn tơhroh dong tah amăng hơdôm hrơi pơ anăp.

Ƀơi anăp tơlơi pơplih ƀu thâo hlâo mơ̆ng kơthel Kalmaegi, him lăng pưh nao pơ Ia rơsĭ Ngŏ lơ 5/11, Jơnum min mơnuih ƀôn sang tơring čar Gia Lai ngă hră pơtrun ječ, kiăng pok pơhai hơdră pơhlôm pơgang hlâo kơtang hloh sa gưl. Hơdôm gơnong bruă, plơi pla hơmâo git gai pok pơhai pơhlôm pơgang kơthel, ia hơjan prong, ia kuor, lŏn tơhroh tañ mơtăn; khut khăt ba pơđuăi mơnuih ƀôn sang pơ dơnung, plung, ter hang ia krông, čư̆ amuñ tơhlŏm, hlâo kơ lơ 4/11. Jơnum min mơnuih ƀôn sang tơring čar kiăng ngă tui hơdră “4 ƀơi anih”, khut ƀu brơi hơmâo tơlơi truh djai mơnuih ôh. Anom bruă git gai tơhan tơring čar prăp lui tơhan, rơdêh, măi mok, biă ñu lĕ măi mok gah jơlan ia rơsĭ hăng rơdêh por ƀu hơmâo pô mơgăt hyu tir, krăo lăng, djru mơnuih bưp tơlơi truh. Gơnong bruă hmua hăng ayuh hyiăng, Gơnong bruă pơkra gơnam sĭ mơdrô gum wai lăng, pok ia dơnao lăp djơ̆, pơhlôm rơnuk rơnua gah dơnung.