Tơdơi kơ giăm 2 wơ̆t hrơi tơjuh hyu tir, sem lăng, bơtơhmal mơnuih ngă soh ƀơi jơlan glông mrô 20, Kông an tơring čar Lâm Đồng hơmâo bơtơhmal rơbêh 1.500 čô mơnuih ngă soh, amăng anun hơmâo hơdôm pluh čô mơnuih mơgăt rơdêh hơmâo jrao ma túy amăng drah. Tơdơi kơ hrơi pơphun hyu tir lơ 15/11 truh ră anai, tơhan wai lăng jơlan glông Kông an tơring čar Lâm Đồng hơmâo ngă hrŏm hăng hơdôm anom apăn bruă hyu tir, wai lăng giăm 40.000 wơ̆t rơdêh nao rai, amăng anun hơmâo giăm 11.000 rơdêh prong pơgiăng gơnam, rơbêh 5.600 boh rơdêh pơgiăng tuai hăng giăm 14.000 rơdêh ôtô...

Mơ̆ng anun hơmâo ƀuh hăng ngă hră bơtơhmal rơbêh 1.500 čô mơnuih, amăng anun hơmâo lu mơnuih mơñum tơpai lơ̆m mơgăt rơdêh, pơđuăi hmar đơi, hơmâo ƀuh giăm 50 čô mơnuih mơgăt rơdêh yua hot jrao ma túy. Tui hăng thượng tá Cù Tuấn Nghĩa, Kơ-iăng khua Anom buă tơhan wai lăng jơlan - Kông an tơring čar Lâm Đồng, hrŏm hăng bruă hyu tir, wai lăng hăng bơtơhmal, bruă pơtô brơi, iâu pơthưr mơnuih ƀôn sang nao rai djơ̆ hăng tơlơi phiăn ăt hơmâo ngă klă mơn.