Mơguah lơ 21/5, Jơnum min mơnuih ƀôn sang tơring čar Lâm Đồng jơnum pơtong glăi tơlơi pơhing bơwih ƀong huă-mơnuih mơnam blan 5 thun 2026, pok pơhai bruă mă phun amăng hrơi blan pơ anăp.

Ƀơi anăp kơ tơlơi hơmâo lu să, phường hăng anih gong gai phara rơnoh prăk mă yua pioh tuh pơ alin kơ bruă čar dŏ ƀiă đơi, jơnum min mơnuih ƀôn sang tơring čar Lâm Đồng pơtrun hiăp djop plơi pla pơtrut hmar, gir run kiăng truh lơ 30/6 boh ƀiă khom ngă djop 40% rơnoh prăk jao.

Thun 2026, rơnoh prăk tuh pơ alin kơ bruă čar, jao kơ gưl să amăng tơring čar hơmâo 1.320 klai prăk. Khă hnun, truh ră anai, kiăng mă yua 126 klai prăk đôč, ngă djop 11%, ƀiă hloh tơlơi ƀuăn 18%. Lăp đing nao, ăt dŏ 10 boh să, phường jao lu prăk samơ̆ aka ƀu mă yua ôh. Tui hăng tơlơi pơtong glăi mơ̆ng sang bruă kơnuk kơna, phun ñu yua bruă git gai dŏ kơƀah, aka ƀu khut khăt ba ôh, tơlơi thâo amăng bruă mă mơ̆ng ƀing khua mua apăn bruă dŏ kơƀah, ngă hră pơar tuh pơ alin sui hăng gun mơta bruă pơklaih ala lŏn, pioh čuk pơkra. Khua Jơnum min mơnuih ƀôn sang tơring čar Lâm Đồng ơi Hồ Văn Mười pơtrun hiăp djop tơring čar prăp lui hlâo, pơsir hĭ tơlơi tơnap tap, hơmâo laih anih jao glăi anih pơklaih ala lŏn dơ̆ pă, brơi čuk pơkra mơtam hăng ba yua prăk tuh pơ alin kơ bruă anun.