Hăng sa čô mơnuih ping gah hlăk ai jơnum ƀơi Grŭp Ping gah plơi Đạ Nghịt 1, să Lát, tơring glông Lạc Dương, tơring čar Lâm Đồng, ayong Čil Ha Sip, djuai ania K’ho tañ lăi pơthâo Tơlơi črâo trun 34 mơ̆ng Grŭp apăn bruă Ping gah tơring čar Lâm Đồng, ngă tui pran jua gơgrong, hur har, pơčeh phrâo, khin pơmin, khin ngă yua kơ bôh tŭ yua hrŏm mơ̆ng plơi pla. Hrŏm hăng ngă giong klă bruă yua kơ Jơnum min mơnuih ƀôn sang să jao, Čil Ha Sip dô̆ kơtưn bruă đang hmua, mă yua hơdră ngă kơphê tui jơlan gah kơjăp hăng pơsur neh wa ƀơi să ngă tui. Ră anai să Lát pơjing hmâo Anom mă bruă hrom gah kơphê hơdjă, hăng hơdôm pluh bôh sang anô̆ mơnuih ƀôn sang lĕ mơnuih djuai ania ƀiă gum hrŏm ngă đang hmua tui tơlơi kiăng blơi mơ̆ng arăng.

 “Tơdơi kơ lăi pơthâo abih tơlơi črâo trun 34 kơ hơdôm tơlơi mơnuih ping gah kiăng ngă hăng hơdôm tơlơi mơnuih ping gah kiăng bĕ lĕ kâo hmâo mă yua laih amăng tơlơi hơdip mơda drơi pô. Ba gru hlâo pioh mơnuih amăng sang anô̆ hăng djop mơnuih jum dar ngă tui”.

Ăt kah hăng Čil Ha Sip, mơnuih ping gah mơ̆ng Grŭp Ping gah plơi Păng Tiêng, să Lát ăt thâo rơđah mơn bruă mă ba jơlan hlâo mơ̆ng mơnuih ping gah amăng ngă tui Tơlơi črâo trun 34 mơ̆ng Grŭp apăn bruă Ping gah tơring čar Lâm Đồng. Tui hăng ơi Rơ Ông K’Thiên, Khua git gai Ping gah plơi Păng Tiêng, rơngiao kơ 4 mơta tơlơi kiăng bĕ anun lĕ: bĕ ngă soh, hmâo yua mă kơ sa drơi pô; bĕ pơtrut nao rai, huĭ gơgrong ba; bĕ ngă bruă tŭ mơ̆ng hmâo, ƀu ba glăi bôh tơhnal; bĕ djă pioh hơnong hơđăp, lăng yôm tơlơi bơrơnôm… mơnuih ping gah amăng grŭp ping gah leng kơ ngă tui klă 3 mơta tơlơi kiăng ngă, anun lĕ: pơhiăp nao hrŏm hăng ngă, ngă tơlơi djơ̆ yua kơ bôh tŭ yua hrŏm; ngă abih bruă gơgrong, pran pơsit prong, tơlơi pơmin pơplih phrâo; ngă ba glăi bôh tơhnal prong hloh, klă hiam hloh. Ơi Rơ Ông K’Thiên, lăi: 

 “Ping gah să hmâo pok pơhai Tơlơi črâo trun 34 mơ̆ng Ping gah tơring čar truh djop mơnuih ping gah hăng rim grŭp ping gah plơi. Mơ̆ng anun, Grŭp ping gah plơi hmâo pok pơhai dơlăm tơlơi črâo trun anai amăng hơdôm mông jơnum grŭp ping gah, yap wot ƀơi hơdôm mông jơnum abih bang mơ̆ng plơi. Mơ̆ng anun, mơnuih ping gah hăng neh wa mơnuih ƀôn sang amăng plơi leng kơ anăp nao hơdôm bôh yôm amăng tơlơi črâo trun hăng ngă tui klă, tơlơi hơdip mơda plơi pla pơplih phrâo, pran jua ƀing gŏp amăng plơi gum hrŏm hơbit".

Să Lát, tơring glông Lạc Dương hmâo rơbêh kơ 70% mrô mơnuih djuai ania ƀiă, biă ñu hơdip hăng bruă ngă đang hmua hăng pla kơphê. Khă bơdjơ̆ nao tơnap tap hrŏm mơ̆ng bruă bơwih ƀong lŏn ia, samơ̆ bruă bơwih ƀong-mơnuih mơnam mơ̆ng să ăt djă pioh hơđong mơn rơnoh pơđĭ kyar. Amăng anun, prăk pơhrui glăi hơnong ñu sa akô̆ mơnuih hmâo laih giăm truh 50 klăk prăk sa thun, đĭ 5 klăk prăk bơhmu hăng akô̆ thun 2024, mrô sang anô̆ ƀun rin ăt hrŏ trun mơn, dô̆ 2,6%, bruă pơphun pơdŏng plơi pla phrâo ba glăi bôh tơhnal klă hăng 17/19 tơhnal pơkă hmâo ngă giong...

 Tui hăng ơi Lơ Mu Ha John, Kơ-iăng Khua git gai Ping gah să Lát, tơring glông Lạc Dương, tơring čar Lâm Đồng, bôh tơhnal anai hmâo tơlơi gum hơgôp yôm phăn mơ̆ng bruă pok pơhai hmao tlôn hăng lar hyu kơtang Tơlơi črâo trun 34 dơlăm prong amăng mơnuih ping gah hăng hơdôm gưl mơnuih ƀôn sang.

  “Tơdơi kơ Tơlơi črâo trun 34 dưi pok pơhai dơlăm prong mơtăm, lu mơnuih apăn bruă, mơnuih ping gah hăng mơnuih ƀôn sang leng kơ tŭ ư hrŏm, anăp nao hăng lăng yôm pran jua ngă tui klă hơdôm tơlơi kiăng ngă, kiăng bĕ. Mơ̆ng anun, mơnuih ƀôn sang jai hrơi jai đăo kơnang kơ hơdôm hơdră pơtrun, jơlan gah mơ̆ng Ping gah hăng Kơnuk kơna”.

 Hrŏm hăng Tơlơi črâo trun 34, Grŭp apăn bruă Ping gah tơring čar Lâm Đồng ăt pok pơhai dong mơn Klah čun 21, lơ 25/10/2021 mơ̆ng Grŭp mă bruă Ping gah dêh čar ta nao hrŏm hăng pơtrut kơtang bruă hrăm, ngă tui tơlơi pơmin, pran jua, kơnuih Hồ Chí Minh hăng bruă gơgrong ba jơlan hlâo mơ̆ng mơnuih apăn bruă, mơnuih ping gah, blung hlâo lĕ mơnuih apăn akô̆. Mơ̆ng anun, pơjing tơlơi pơplih ha amăng plĕ, rơđah gru thâo hăng ngă bruă mơ̆ng hơdôm gưl ping gah, gong gai, mơnuih apăn bruă, mơnuih ping gah amăng bruă ngă tui tơpă tơlơi phiăn pơkă mơ̆ng Ping gah, tơlơi phiăn mơ̆ng Kơnuk kơna, pơjing pran phrâo pơtrut tơlơi hơdip mơ̆ng hơdôm bôh plơi pla lăi ha jăn, bơwih ƀong-mơnuih mơnam lăi hrŏm mơ̆ng plơi pla pơđĭ kyar./.