Amăng jơlan hơdră, ƀing mơnuih hyu mă akan hơdang hơmâo arăng lăi pơthâo hơdôm boh tơhnal tong ten amăng tơlơi phiăn hyu mă akan hơdang thun 2017; črâo ba kơ bruă mă yua măi krăo lăng, čih pioh bruă mă akan hơdang hăng ngă tui bruă ngă hră pơ-ar lơm tơbiă hyu, pơwot glăi pơ hang. Anom bruă bơdjơ̆ nao ăt lăi pơthâo kơ boh thâo pơgang hŭi bưp tơlơi truh sat hăng gum hrŏm hyu ĕp, mă mơnuih amăng ia rơsĭ.

Ơi Đồng Văn Thi, mơnuih hyu mă akan hơdang phương Phú Thủy brơi thâo, hơdôm boh thâo hơmâo lăi pơthâo brơi amra djru neh met wa hluh rơđah tơlơi glăm ba mơng bruă mă akan hơdang, hơđong pran jua tơbiă hyu ia rơsĭ hăng mă akan hơdang djơ̆ tơlơi phiăn. “Ăt pơwot glăi pơ hang sui laih, truh ră anai kah hyu mă dong, ăt hmư̆ arăng lăi nao IUU samơ̆ hlâo anun aka thâo tong ten ôh. Hrơi anai ƀing gơñu nao jơnum, hmư̆ arăng lăi kiăng mă akan djơ̆ tơlơi pơkă, anăm hyu mă ƀơi hơdôm kual ia rơsĭ Kơnuk kơna kŏm, ngă hiưm pă kiăng bruă hyu mă akan hơdang djơ̆ tơlơi phiăn”.

Tui anom bruă git gai tơhan wai pơgang guai Thanh Hải, hrŏm hăng bruă pel ĕp ƀơi hơdôm tơdrun hang ia rơsĭ, bruă lăi pơthâo tơlơi phiăn ƀơi anăp djru brơi mơnuih mă akan hơdang hluh rơđah tơlơi glăm ba, anăm mut nao kual ia rơsĭ dêh čar pơkŏn, ngă tui hơdôm tơlơi rơkâo amăng hyu mă hăng pơhlôm rơnuk rơnua brơi mơnuih, ƀattô. Đại úy Tạ Hữu Nghĩa, kơ-iăng khua grup pơtrut pơsur mơnuih ƀôn sang, puih kơđông tơhan wai pơgang guai Thanh Hải brơi thâo: “Puih kơđông tơhan wai pơgang guai Thanh Hải gơgrong gum hrŏm hăng hơdôm anom bruă, gơnong bruă, khul grup hăng hơdôm anom bruă bơdjơ̆ nao pok pơhai ha amăng plĕ lu hơdră, amăng anun đing nao pơtô pơblang ƀơi sang jơnum hăng lăi pơthâo tơl tơdrun mă akan hơdang kiăng neh met wa thâo tơlơi pơkă amăng tơlơi phiăn. Laih dong, anom bruă ăt pơmut hrŏm boh tơhnal pơtô pơblang tơlơi phiăn amăng hơdôm mông jơnum pơƀut kiăng mơnuih mă akan hơdang hluh hăng ngă tui djơ̆ tơlơi pơkă lơm hyu mă akan hơdang amăng ia rơsĭ”.

Pơ anăp anai, anom bruă git gai tơhan wai pơgang guai tơring čar Lâm Đồng tŏ tui gum hrŏm hăng djop gơnong bruă, ƀon lan pơtrut kơtang bruă pơblang brơi tơlơi phiăn ƀơi kual ter hang ia rơsĭ, pơgôp pơjing bruă mă akan hơdang thâo glăm ba, pơđĭ kyar hơđong kjăp hăng ngă tui tŭ tui hơdôm tơlơi pơkă mơng Jơnum min kual Mi kô̆ amăng pơgăn mă akan hơdang ča čot IUU./.