Jơnum bơkơtuai anai hơmâo lu tơlơi čih ba pơdah thâo, djru tơlơi pơhiăp, pơgôp pran jua tơlơi pơmin kơ bruă pơkă hơnơ̆ng, anăp nao pơblih kiăng djă pioh anŏ mơtah mơda, ngă hmua ba yua boh thâo ia rơgơi phrâo mơ̆ng tơring čar Lâm Đồng; hmư̆ ƀing khua mua git gai wai lăng, ƀing mơnuih rơgơi kơhnâo kah pơpha tơlơi thâo boh yom phun pơdjơ̆ nao mơnuih git gai wai lăng, hơdră mă bruă, mơneč pơsir kiăng pơtrut pơblih yua ia rơgơi pơgang pioh anŏ mơtah mơda, ăt kah hăng anŏ gêh găl pioh kơ ƀing ngă bruă mơdrô tuh pơ alin djop kơčăo bruă, hơdôm bruă pơblih yua anŏ mơtah mơda.

Hrŏm hăng anun, ƀing khua mua ăt pơčrong sai kơ anŏ tuh pơ alin prăk kăk amăng bruă pơtrut pơđĭ kyar khom hơmâo mơtah mơda, hơđong kơjăp brơi tơlơi bơwih ƀong huă amăng kual plơi pla djuai ƀiă ƀơi tơring čar. Nai tha prin, nai prin tha ơi Trần Hồng Thái, Khua Jơnum min mơnuih ƀôn sang tơring čar Lâm Đồng lăi, mông jơnum anai jing anŏ gêh găl kơ tơring čar pôr pơthâo tơlơi gêh găl, anŏ thâo hơmâo hăng bruă či tuh pơ alin, sĭ mơdrô ƀơi Lâm Đồng. Tơring čar amra tŭ mă djop mơta tơlơi pơgôp hiăp, tơlơi pơtô ba mơ̆ng ƀing mơnuih rơgơi kơhnâo, ƀing ngă bruă sĭ mơdrô, mơ̆ng anun kiăng sem lăng, anăp mă bruă, pơtrut bơwih ƀong huă mơnuih mơnam, pơblih kiăng djă pioh anŏ mơtah mơda hơđong kơjăp ƀơi tơring čar Lâm Đồng kơñ pơgi ni  anăp.