Tui hăng tơlơi lăi pơthâo glăi mơ̆ng Gơnong bruă Bôh thâo, Bơkơjăp drơi jăn hăng Tuai čuă ngui tơring čar Lâm Đồng, 6 blan akô̆ thun anai, Lâm Đồng ngă pơhưč rơbêh kơ 12 klăk wot čô tuai, hmâo 54% kơčăo bruă hăng đĭ 20% bơhmu hăng thun hlâo. Amăng mrô anai hmâo giăm truh 800.000 wot čô tuai dêh čar tač rơngiao, đĭ 56%. Bruă pơmut hrŏm 3 bôh tơring čar Lâm Đồng, Bình Thuận hăng Dak Nông pơjing tơring čar Lâm Đồng phrâo hmâo pok tơbiă laih lu anih anom pơtrut bruă tuai čuă ngui pơđĭ kyar, pơhlôm ngă giong tơhnal čơkă rơbêh kơ 22,4 klăk wot čô tuai amăng thun 2025.

Khă hnun hai, bruă pok prong anih anom mă bruă čar ăt pơjing rai mơn lu tơlơi lông kơ anom mă yua, jơlan nao rai, mơnuih mă bruă kơjăp hăng bôh thâo mrô kơplah wah hơdôm anih anom... Tui hăng ơi Nguyễn Văn Lộc, Khua Gơnong bruă Bôh thâo, Bơkơjăp drơi jăn hăng Tuai čuă ngui tơring čar Lâm Đồng, anai lĕ hơdôm anô̆ ngă gun kiăng tañ dưi đing nao pơtlaih.

“Ƀing ta hmâo amăng ƀrư̆ pơjing glăi hla kak tuai čuă ngui mơ̆ng Lâm Đồng, samơ̆ ƀu djơ̆ lŏm lui abih bang hơdôm anô̆ yôm anih tuai čuă ngui mơ̆ng Đà Lạt, Phan Thiết ôh mơ̆, pơjing phrâo ñu đôč. Ngă hiưm hơpă mă yua anom tuai čuă ngui mơ̆ng Đà Lạt, tuai čuă ngui Dak Nông hăng tô nao rai tuai čuă ngui kual ia rơsĭ, pơjing jơlan pơlir hơbit tuai čuă ngui mơ̆ng ia rơsĭ, čư̆ siăng truh kual lŏn dăo. Pioh dưi pơđĭ kyar tuai čuă ngui lĕ khom pơhrui hrŏm abih bang, biă ñu anom mă yua. Kah hăng Đà Lạt - Phan Thiết, Đà Lạt - Gia Nghĩa mơ̆ng tơdơi kơ tlaih rơngai truh ră anai ƀing ta ăt nao rai ƀơi hơdôm jơlan hơđăp. Čang rơmang pơ̆ anăp tơring čar amra tuh pơplai hơdôm ară jơlan anai”.

Dong mơ̆ng hrơi pơmut hrŏm jing tơring čar phrâo, Jơnum min mơnuih ƀôn sang tơring čar Lâm Đồng rơkâo Gơnong bruă Bôh thâo, Bơkơjăp drơi jăn hăng Tuai čuă ngui tơring čar gum hrŏm hăng Gơnong bruă Bôh thâo phrâo hăng Hơdră phrâo măi mok kơsem min hăng čih pơkra hơdôm jơlan gah gêh gal pioh klă kơ tuai hyu čuă ngui, pơtrut bruă tuai čuă ngui pơđĭ kyar. Tui tơlơi ba tơbiă mơ̆ng Gơnong bruă Bôh thâo phrâo hăng Hơdră phrâo măi mok Lâm Đồng, ƀơi anăp, tơring čar amra pơmut hrŏm hơdôm plăng pơhing măi mok tuai čuă ngui hơdeč hmar mơ̆ng 3 bôh tơring čar hơđăp jing sa plăng pơhing măi mok tuai čuă ngui mơ̆ng tơring čar phrâo. Hrŏm hăng anun, pơmut hrŏm hơdôm anăn mă yua pioh kơ tuai amăng telephone hơdeč hmar mơ̆ng dua tơring čar Lâm Đồng hăng Bình Thuận hơđăp, pơjing sa app mă yua hrŏm hmâo tơlơi pơhrua nao hơdôm tơlơi pơhing, gêh gal kơ tuai mơ̆ng Dak Nông. Kiăng pơplih rơnoh ñu, pơđĭ dlông tơlơi lông lăng kơ tuai, anăn mă yua anai tum pơƀut AI, pơkĕ hrŏm bôh thâo pơčeh phrâo mut amăng plăng. Ơi Võ Thành Công, Khua Gơnong bruă Bôh thâo phrâo hăng Hơdră phrâo măi mok tơring čar Lâm Đồng brơi thâo:

“Tuai ƀơi ƀôn prong Hồ Chí Minh hmâo tơlơi kiăng hyu čuă ngui mơ̆ng sang anô̆ 4 čô amăng 3 hrơi, gơñu kơnong kơ pok ƀudah pơhiăp amăng app ƀing ta kơ tơlơi kiăng tui anun. App amra lăi pơthâo kơ pô hăng hơdôm tơlơi lăi pơthâo brơi pơkon; hrơi tal sa nao dơ̆ hơpă, anih anom hơpă, pơ̆ hơpă, mă yua rơdêh hơget hăng lông lăng tơlơi hơget... Tơdah dưi ngă tui anun, tuai amra ngă tui klă hơdôm bruă čuă ngui mơ̆ng pô ƀơi tơring čar".

Ơi Hồ Văn Mười, Khua Jơnum min mơnuih ƀôn sang tơring čar Lâm Đồng pơsit ƀơi plơi pla hmâo anih anom prong pioh pơđĭ kyar bôh thâo đưm, bơkơjăp drơi jăn hăng tuai čuă ngui. Amăng anun Đà Lạt iâo lĕ “Lâm Đồng bă kơ bơnga”, Bình Thuận iâo lĕ “Lâm Đồng ia rơsĭ mơtah”, Dak Nông iâo lĕ “Lâm Đồng bă kơ mơtă lăng”. Abih bang hơdôm anô̆ gal, tơhnal gal prong anai khom hmâo tơlơi gum hrŏm dưm kơnar, lăp djơ̆ hrŏm hăng ha amăng plĕ bruă tuai čuă ngui mơ̆ng plơi pla phrâo pơđĭ kyar kơtang hăng kơjăp phik.

“Pơtŏng sit Lâm Đồng hmâo anih anom kơ bôh thâo đưm, bơkơjăp drơi jăn hăng tuai čuă ngui prong biă. Tơlơi lĕ ră anai ngă tui anih anom prong anun hiưm ñu anun yom hloh. Tơlơi pơmin tơring čar ih, tơring čar kâo, tơring čar adih pơmut hrŏm jing 3 lĕ ƀu djơ̆ ôh. Klâo bôh tơring čar kah hăng tâo kan, kơtang biă, samơ̆ tâo kan anai akă dưm kơnar. Ră anai kual ia rơsĭ hăng bă kơ bơnga lĕ phun ñu hơđong pran jua laih, samơ̆ kual Dak Nông yua kơ tơlơi kiăng anun dô̆ tơdu jing kiăng hmâo tơlơi pơđĭ dlông”./.