Amăng jơnum anai, mơnuih ngă hmua, anom bơwih ƀong sĭ mơdrô hăng anom bơwih ƀong hrŏm mơ-it nao giăm 400 tơlơi tơña, lăi nao ƀơi anăp 25 tơlơi rơkâo kơ bruă ngă hră pơ-ar, pơjing kual pla, mă yua boh thâo ia rơgơi-boh thâo măi mok, ĕp pơƀuh anih pla, pơkra gơnam klă hloh, hră pơhlôm ngă hmua, wai pơgang jum dar ƀon lan hăng djru mơnuih mơnam

Ƀing khua mua pơčrông sai lu grup hơdră bruă phun anun lĕ plai ƀiă răm rai yua ayuh hyiăng pơplih sat, pơđĭ kyar ngă hmua rơgơi, pok prong sĭ mơdrô-hrưn đĭ hiam hơdjă hăng pran bơkơtưn mơng gơnam đang hmua, pơtrut bơwih ƀong hrŏm-glông pơlir hơbit, pơplih klă amăng čan prăk, lŏn mơnai hăng tơlơi pơhing sĭ mơdrô gơnam tam.

Lu tơlơi bơngô̆t ƀơi anăp kơ bruă pleč blor amăng sĭ mơdrô, arăng pơ anăn gơnam đang hmua Đà Lạt anun bơdjơ̆ sat nao mơnuih ngă hmua. Yă Lương Thị Yến Vân, Khua anom bơwih ƀong hrŏm Vườn Nhà Đà Lạt brơi thâo:

“Sa kĭ boh dâu tây kâo pla nua rơgêh hloh ăt 100 rơbâo prăk, lơm ƀhu krô 10 kĭ kah mơng hơmâo 1 kĭ. Yap wŏt prăk apui lơtrik, mơnuih mă bruă, abih tih ñu lĕ 1,2 klăk prăk sa kĭ dâu krô. Samơ̆ gơnam arăng sĭ anun lĕ pơ sang čơ Đà Lạt kơnong 250 rơbâo sa kĭ, lơm anun ƀu hơmâo hră pơ-ar rơđah rơđông kơ anih pla, anih pơkra samơ̆ ăt dưm anung hăng čih anăn dây tây Đà Lạt. Laih dong boh hồng mơtah, blơi mut ha boh container ba glăi tĕp anăn pla ƀơi Đà Lạt. Kâo lăng ƀu hơmâo anom bruă hơpă ôh hyu wai pơgang brơi tơlơi dưi mơng mơnuih ngă hmua, ƀing gơmơi bơngô̆t biă mă kơ bruă tui anai”.

Khua mua hơdôm gơnong bruă, sang bruă hơmâo lăi glăi lu boh tơhnal; samơ̆ hơdôm bruă aka ƀu lăi glăi tong ten amra pơƀut glăi hăng amra mơ-it hră lăi glăi mơnuih ƀôn sang.

Đĭ pơhiăp amăng mông jơnum, Khua Jơnum min mơnuih ƀôn sang tơring čar Lâm Đồng ơi Hồ Văn Mười lăi pơtong hăng pran jua “lăi glăi tơpă, pơsir hĭ tañ”. Tơring čar ƀuăn pơsir hĭ hmao tlôn hơdôm tơlơi rơkâo lăp djơ̆ mơng mơnuih ngă hmua; hơdôm boh tơhnal rơgao tơlơi glăm ba hơmâo lăi pơthâo gơnong glông. Kơ bruă gơnam mơng pơkŏn ba nao mă anăn gơnam đang hmua ƀon lan, ơi Hồ Văn Mười pơsit tong amra pơsir hĭ khut khăt bruă anai:

“Tơdơi kơ mông jơnum anai, ƀing gơmơi amra git gai hơdôm anom bruă bơdjơ̆ nao, amăng anun tơlơi glăm ba phun mơng tơhan kông ang, gơnong bruă sĭ mơdrô-tuh tia pơkra ming, wai lăng sĭ mơdrô hăng hơdôm anom bruă pơkŏn. Bruă anai ƀu tơnap ôh tơdah ƀing ta ngă khut khăt”.

Jơnum anai čang rơmang pơtrut kiăng bruă ngă hmua ƀơi Lâm Đồng pơđĭ kyar hơđong kjăp, đĭ tui prăk pơhrui hăng tơlơi hơdip kơ mơnuih ngă hmua lơm ayuh hyiăng jai pơplih sat ră anai./.