Khă hnun, truh abih blan 10, tơring čar phrâo brơi giăm 30% mrô pơkă đôč. Hơdôm kơčăo bruă prong samơ̆ prăk brơi nao aset biă mă, biă ñu dua kơčăo bruă pơkra jơlan rơdêh đuăi hmar Bảo Lộc - Liên Khương hăng Tân Phú - Bảo Lộc, hăng mrô prăk rơbêh 5.000 klai, samơ̆ aka ƀu brơi nao prăk ôh. Phun ñu yua dŏ kơđông bruă jao lŏn čuk pơkra jơlan, hrŏm hăng adai hơjan na nao, ƀing gơgrong tuh pơ alin ngă bruă ƀu hơdeč ôh.

Ƀơi anăp bruă brơi prăk kaih, Jơnum min mơnuih ƀôn sang tơring čar Lâm Đồng kiăng pô tuh pơ alin gơgrong bruă hloh, krăo lăng tong ten anih pơkra, pel ĕp, sem lăng hăng khut khăt lăi mơtăm yơh ƀing ngă kaih. Laih dong, Jơnum min mơnuih ƀôn sang hơdôm boh să, phường, anih hơmâo kơčăo bruă kiăng pơtrut ngă tañ, ngă wơ̆t hrơi pơdơi mơtăm yơh, pơhlôm jao anih čuk pơkra agaih, hiam kơ hơdôm ring bruă yom phun. Hơdôm gơnong bruă bơdjơ̆ nao ăt ngă hrŏm kjăp, pơhlom pơsir đut tơhnal tơlơi dŏ gun kơ nua lŏn, hră tuh pơ alin, hăng hrơi pơkă lăi pơthâo bruă ngă kơ Jơnum min mơnuih ƀôn sang tơring čar./.