Hăng akŏ ñu “Đà Lạt-plơi prong pă bơyan bơnga”, Festival bơnga Đà Lạt tal 9 thun 2022 pơphun amăng 2 blan, mơ̆ng lơ 1/11 truh lơ 31/12. Hrom hăng hơdră pơdah thâo lu bruă ƀơi Đà Lạt, rơbêh 40 hơdră ngă tui ăt pơphun lu mơ̆n amăng tơring glông pơkŏn amăng tơring čar. Ră anai hơdôm hơdră ngă tui hơmâo pơphun laih amăng hơdôm tơring glông, plơi prong amăng tơring čar kah hăng: Khul ngă hiam ao dai rup bơnga, pok pơhai pơdă rup hăng lăi pơthâo lu gơnam sĭ mơdrô jing boh čroh đang hmua, jơnum mơak anăn Tơpai Vang phrâo pơkra….Tui hăng ơi Sử Thanh Hoài, Khua tơring glông Lạc Dương, tơring čar Lâm Đồng, anih prăp lui kơ bruă kiăo tui ngă hrom pơgang tơlơi rơnuk rơnua hăng mơak klă hloh kơ mông ngui ngor Festival bơnga tal anai lăi:

“Ngă tui tơlơi pơtrun mơ̆ng khua tơring čar kơ bruă djop tơring glông khom ngă hrom hơdră kiăng gum hrom pơphun Festival bơnga Đà Lạt, tơring glông Lạc Dương ăt hơmâo lu bruă mă ngă hrom. Anun lĕ bơyan boh hồng tơsă, pơphun lơ 19/11, hrom hăng anun tơring glông Lạc Dương ăt pơphun pơplông hơtŭk riă tơnă hơbai, atông čing ring hơgor, ngă hrom djop sang bruă sĭ mơdrô pơphun pơplông brô̆ aseh ƀơi să Dă Nhim”.

Hrom hăng gong gai kơnuk kơna tơring glông, djop sang bruă bơwih ƀong huă ba tuai hyu ngui, sang sĭ mơdrô mơnong ƀong huă, sang jưh tuai, anih hyu ĕp lăng pioh kơ tuai hyu ngui….ăt prăp lui tơlơi gêh găl tong ten bơwih brơi klă kơ tuai hyu ngui. Ơi Đinh Thiên Long, khua sa boh sang sĭ mơdrô mơnong ƀong huă ƀơi plơi prong Đà Lạt brơi thâo, kiăng ngă hrom Festival bơnga Đà Lạt tal anai, rơngiao kơ pơđĭ tui anŏ hiam klă bơwih brơi kơ tuai, sang sĭ mơdrô gơñu prăp lui lu mơta mơnong ƀong huă hơmâo phara hơjăn đôč, pơkra ming mơ̆ng añăm pơtam hơbơi, boh čroh kiăng ngă anŏ phara hơjăn mơ̆ng Đà Lạt.

“Ƀơi anăp kơ Festival lĕ bruă blung a gơmơi kiăng ngă giong lĕ rơnoh yôm phun mơ̆ng sa boh sang sĭ mơdrô mơnong ƀong huă jơman tŭ yua, hơdjă rơgoh, tŭ jum tuai lu mut ƀong huă. Đà Lạt hơmâo lu gơnam pơkra ming mơnong ƀong huă hăng lu mơta pơjeh djuai klă, anun yơh gơmơi kiăng kơ tuai găn rơgao, hơduah ĕp kơ gru grua mơnong ƀong huă mơ̆ng mơnuih ƀôn sang amăng plơi prong bơnga anai”.

Rơngiao kơ hơdră adoh suang, hok mơak pơdah thâo, lăi pơthâo djop mơta mơnong ƀong huă djă anăn gơnam sĭ mơdrô djă anăn “Đà Lạt-pơjing rai anŏ hiam phara biă mă”, bơnga lĕ sa mơta gơnam hlăk hơmâo gong gai kơnuk kơna djop plơi pla, mơnuih ƀôn sang hăng sang bruă sĭ mơdrô prăp lui tong ten bơwih brơi kơ tuai hyu lăng, hyu sem djop anih pơdă lui bơnga amăng tơdron prong, djop jơlan anet prong brơi hiam jum dar ia dơnao Hồ Xuân Hương. Kơnong kơ kông ty bơwih bơwang amăng plơi prong Đà Lạt hơmâo prăp rơmet rơbêh 400 rơbâo blŏ, ƀưh bơnga, kơdŭng dưm bơnga djop mơta pioh man pơdong ngă anih ĕp lăng hiam, dăp ƀơi djop akiăng jơlan amăng tal Festival bơnga anai.