Hrơi pơgi lơ 9/10, Jơnum ruah khua ping gah tơring čar Lâm Đồng tal I, rơwang bruă thun 2025-2030 amra sit nik pơphun yơh. Ƀơi Đà Lạt, anih pơphun jơnum hăng lu anom phun amăng tơring čar kah hăng ƀơi Dak Nông, Bình Thuận hơđăp ăt hlă hla gru hyơ hyơr djoh akiăng jơlan, bơbung sang bruă, sang anŏ mơnuih ƀôn sang, pơdah rai pran jua mơak čơkă mông jơnum prong.

Jơnum ruah khua ping gah tơring čar Lâm Đồng tal I, rơwang bruă thun 2025-2030 jing sa bruă mă, tơlơi jơnum prong lăp hơdor pioh, yua pơmut klâo boh tơring čar Dak Nông, Bình Thuận hăng Lâm Đồng jing sa, ba tơring čar anai yak nao črăn pơđĭ kyar phrâo hlom bomhăng hơđong kơjăp hloh.

Ơi Nguyễn Khắc Bình, Khua ƀirô ping gah tơring čar Lâm Đồng, brơi thâo, Hră pơar lăi pơthâo amăng mông jơnum hơmâo prăp lui tong ten. Hră lăi pơthâo kơđi čar hơmâo mă hiăp pơgôp mơ̆ng Jơnum min djop djuai ania mơnuih mơnam dêh čar hăng djop sang bruă, khul grup mơnuih tơpuôl, anom bruă kơđi čar, tơlơi pơgôp hiăp mơ̆ng mơnuih mơnam amăng tơring čar; tơlơi pơgôp hiăp ƀơi mông jơnum ruah khua ping gah 128 boh anih, sang bruă, khul bruă đơ đam tơring čar; pơphun jơnum bơkơtuai hơduah ĕp boh thâo phrâo ia rơgơi, anăp či pơđĭ kyar; laih dơ̆ng mă hiăp pơgôp phun, tơlơi git gai  mơ̆ng Grup mă bruă Ding jum kơđi čar. Bruă prăp lui kơ tal jơnum ruah khua ping gah tơring čar Lâm Đồng hơmâo ngă giong laih.