Hăng tơlơi pơsit “Gum pơgôp-Ngă pô-Tơpă sit-Pran kjăp-Pơplih kơtang-Pơđĭ  kyar”, Jơnum khua mua Ping gah tơring čar Lâm Đồng tal I, rơwang thun 2025-2030 amra pơphun amăng 3 hrơi, dong mơng lơ 9-11/10/2025 ƀơi Sang jơnum Sang hră pơtô ling tơhan blah hăng rŏng lŏn, phường Lâm Viên-Đà Lạt, tơring čar Lâm Đồng. Nao Jơnum hơmâo 498 čô khua mua sit nik, amăng anun hơmâo 92 čô khua mua hơđăp hăng 406 čô khua mua hơmâo ruah đĭ mơng 128 grup Ping gah amăng Ping gah tơring čar pơ ala brơi giăm 119.400 čô mơnuih Ping gah đơ đam tơring čar.

Ơi Nguyễn Khắc Bình, Khua anom bruă Ping gah tơring čar Lâm Đồng brơi thâo, črăn hră lăi pơthâo kơđi čar mơng jơnum ba tơbiă 3 boh tơhnal pơplih kơtang akŏ phun kiăng ngă tui rơwang phrâo: Anai lĕ tơlơi đing nao pơđĭ kyar anih anom, jơlan glông phun; pơtrut pơplih ngă hră pơ-ar; đing nao bruă pơtrut kơtang ruah khua mua, dưm dăp, mă yua ƀing apăn bruă pơhlôm djơ̆ mơnuih, djơ̆ bruă”.