Tơring čar ăt pơkă tơhnal ngă bruă rơđah rơđông, tum teč mă yua prăk čan rim klâo blan sa wơ̆t. Kiăng dưi ngă bruă anai, Jơnum min mơnuih ƀôn sang tơring čar Lâm Đồng pơtrun hiăp djop gơnong bruă, anom bruă ƀơi tơring čar, djop să hăng pô sang bruă tuh pơ alin man pơdong brơi kơtưn mă bruă tơpă hnơ̆ng hloh, tuh pơ alin kơ bruă čar; pơtong rơđah pô gơgrong glăm ba amăng bruă mă mơ̆ng rim čô mơnuih apăn bruă pô krăp lăng djop kơčăo bruă, rim črăn bruă.

Jơnum min mơnuih ƀôn sang tơring čar Lâm Đồng jao kơ Gơnong bruă Čar git gai, ngă hrŏm djop sang bruă pơdjơ̆ nao, kơtưn bruă sem lăng bruă mă kơnuk kơna hăng djop sang bruă, anom bruă, gong gai pơyŭ amăng bruă ngă tui bruă jao čan prăk yua bruă čar; lăi pơthâo pơsir khut khăt hlơi pô ngă soh, ngă ƀu giong bruă jao. Laih dơ̆ng, kơsem min hơdră či ngă, lăi pơthâo Jơnum min mơnuih ƀôn sang tơring čar, lăng nao boh tơhnal brơi yua prăk čan tuh pơ alin kơ bruă čar kiăng ngă anŏ gêh găl tơhnal pơkă djơ̆ hnơ̆ng, pơtong sit boh tơhnal ngă bruă mơ̆ng ƀing khua mua, pioh jao bruă, pơđĭ ngă khua pơ anăp anai. Thun 2026, rơnoh prăk tơring čả Lâm Đồng dưi jao ngă lĕ rơbêh 20.000 klai prăk. Truh rơnuč blan 4, tơring čar Lâm Đồng kiah mă yua 875 klai prăk, aka truh 10% akŏ bruă jao ôh.