Hơdôm blan anai, ayong K’Sáu, Khua plơi plơi K’Rèn, să Hiệp Thạnh, tơring čar Lâm Đồng hyu pôr pơthâo na nao kơ Tơlơi phiăn ruah khua, lăi dlăm kơ tơlơi phiăn abih bang thâo, dưm kơnar, ngă sit ƀơi anăp hăng plĕ hră hơgŏm; laih dong lăi pơthâo bruă tơbiă anăn či ba ruah, bruă pơčrông sai, čih anăn mơnuih nao plĕ hră. Tui hăng ayong K’Sáu, bruă ngă tui tơlơi pơkă amra pơhlôm brơi bruă ruah khua amăng lơ 15/3 pơ anăp bơkơnar, dưi ngă pô, djơ̆ tơlơi phiăn, rơnuk rơnua hăng mơnuih nao ruah khua mơ̆ng plơi ruah mă mơnuih rơgơi, thâo pơmin: “Hăng bruă jao kơ kâo lĕ hyu pôr pơthâo, pơblang brơi neh wa thâo hrơi ruah khua, kơ mơnuih či ba ruah. Lăng neh wa mơak biă lơ̆m hmư̆ hing. Phrâo anai jơnum pơčrông sai tơbiă anăn mơnuih či ba ruah amăng plơi hơmâo 2 čô, sa čô đah rơkơi hăng sa čô đah kơmơi či ruah ngă ding kơna pơ ala mơnuih ƀôn sang să pơ anăp anai. Neh wa leng kơ tŭ ư soh”.

Ƀơi tơring čar Lâm Đồng, kiăng mơnuih nao ruah khua hăng abih bang mơnuih ƀôn sang thâo rơđah kơ bruă ruah khua, ping gah, jơnum min djŏp djuai ania mơnuih mơnam hăng djŏp khul grup kơđi čar - mơnuih mơnam, lăi pơthâo rơđah, djŏp djel laih Tơlơi pơčrâo trun mrô 46 lơ 16/5/2025 mơ̆ng Ding jum kơđi čar, Tơlơi pơčrâo trun mrô 02 lơ 23/2/2025 mơ̆ng Khul khua apăn bruă Ping gah kơ git gai bruă ruah khua pơ ala mơnuih ƀôn sang dêh čar tal 16 hăng khua pơ ala mơnuih ƀôn sang djŏp gưl rơwang thun 2026-2031. Mơ̆ng anun, Jơnum min djŏp djuai ania mơnuih mơnam, khul grup kơđi čar - mơnuih mơnam ngă hrŏm hăng anom apăn bruă pơƀut pôr pơthâo tơlơi pơplih phrâo mơ̆ng Phiah Phiăn thun 2013 tơdơi kơ čih pơkra glăi, pơhrua tui hơdôm tơlơi hăng Tơlơi phiăn akŏ pơdong anom bruă gong gai (čih pơkra glăi); Tơlơi phiăn čih pơkra glăi, pơhrua tui hơdôm tơlơi mơ̆ng Tơlơi phiăn ruah khua pơ ala mơnuih ƀôn sang dêh čar hăng khua pơ ala mơnuih ƀôn sang djŏp gưl; hơdôm hră pơ-ar, tơlơi git gai, pơtô ba mơ̆ng djŏp anom bruă mơ̆ng Khul ruah khua Dêh čar ta...Ơi Mai Linh Sơn, Khua Jơnum min djŏp djuai ania mơnuih mơnam Việt Nam să D’ran, tơring čar Lâm Đồng brơi thâo: “Jơnum min djŏp djuai ania mơnuih mơnam ngă hrŏm hăng Jơnum min mơnuih ƀôn sang, Anom bruă Gru grua Pôr pơhing lăi pơthâo bruă ruah khua hăng lu mơta bruă ƀuh ƀơi anăp, dưi ĕp ƀuh, sem lăng. Dua lĕ pôr amăng plang Zalo, hăng pôr pơthâo tui mông jơnum mă tơlơi pơgôp hiăp mơ̆ng mơnuih ƀôn sang pơ anih dŏ kiăng ƀing nao plĕ hră pơhlom tơlơi dưi hăng bruă jao kơ ƀing gơñu djơ̆ tui Tơlơi phiăn ruah khua. Pơhlom kiăng abih bang mơnuih thâo hluh bruă bơdjơ̆ nao tơlơi gơgrong bruă mơ̆ng sa čô mơnuih lơ̆m akŏ pơdong gong gai. Ngă hiư̆m pă khua mua pơ ala mơnuih ƀôn sang mơ̆ng tơring čar truh pơ să dưi pơ ala brơi tơlơi pơmin, tơlơi kiăng khăp mơ̆ng Mơnuih ƀôn sang”.

Ơi Trần Hùng Dũng, Khua jơnum min mơnuih ƀôn sang să Đơn Dương, tơring čar Lâm Đồng brơi thâo: “Mơ̆ng bruă hyu pôr amăng aloa, giong anun ƀơi Glông pôr điện tử hăng plang pôr pơhing pơkŏn dong, jing pôr pơthâo brơi djŏp mơnuih ƀôn sang laih. Mơ̆ng anun neh met wa ăt thâo rơđah mơn tơlơi gơgrong bruă, anŏ yom mơ̆ng bruă ruah khua, anun jing hok mơak biă, djru brơi bruă ruah khua pơ ala mơnuih ƀôn sang dêh čar hăng khua pơ ala mơnuih ƀôn sang djŏp gưl pơ anăp anai truh kih hiam klă”.

Kiăng hrơi ruah khhua pơ ala mơnuih ƀôn sang dêh čar hăng khua pơ ala mơnuih ƀôn sang djŏp gưl lơ 15/3 pơ anăp rơnuk rơnua, dưi ngă pô, sit nik jing tal jơnum kơđi čar prong dlăm djŏp anih, jing “Hrơi mơak prong mơ̆ng lŏn ia ta”, tơdơi kơ mông Jơnum ruah khua tal 3 phrâo rơgao, bruă pôr pơhing kơ jơnum kơđi čar yom anai hơmâo tơring čar Lâm Đồng pơtrut kơtang hloh kiăng bơkơnar, abih bang mơnuih ƀôn sang tŭ ư.

Hrŏm hăng pôr pơthâo ƀơi anăp mơnuih plĕ hră hăng mơnuih ƀôn sang, 124 boh să, phường, kual wai lăng phara mơ̆ng tơring čar hơmâo akă yol rơbêh 2.600 pok pa nô kơ hrơi ruah khua; atôl rơbêh 3.000 pok hla kơ, hla kơ hồng kỳ; por amăng aloa djŏp tơlơi kơ Tơlơi phiăn ruah khua; tơlơi dưi hăng bruă kiăng ngă mơ̆ng ƀing nao plĕ hră. Ƀơi hơdôm glông jơlan prong, jê̆ đang bơnga ƀơi phường Xuân Hương - Đà Lạt, Bắc Gia Nghĩa, Phan Thiết, Hàm Thắng...jing glông jơlan pơƀut pôr kơ ruah khua mơak mơai biă mă, hơmâo pran dañ hăng djru ngă thâo hluh rơđah kơ tơlơi ta gơñăm nao, boh pia yom, tơlơi dưi, tơlơi kiăng ngă mơ̆ng mơnuih nao plĕ hră.

Yă Phạm Thị Phúc, Kơ-iăng khua ping gah tơring čar, Khua Jơnum min djŏp djuai ania mơnuih mơnam Việt Nam tơring čar Lâm Đồng brơi thâo, ƀơi hơdôm boh să kual ataih, asuek asueo, anih hơmâo lu mơnuih tui đăo, hăng neh met wa djuai ania ƀiă, kiăng bruă pôr pơhing ruah khua tŭ yua hloh, Jơnum min djŏp djuai ania mơnuih mơnam pơtrut tui tơlơi gơgrong bruă mơ̆ng 900 čô ană plơi đăo kơnang, hiăp ană plơi hmư̆, ƀing khua đăo amăng bruă djru gong gai: “Jơnum min djŏp djuai ania mơnuih mơnam gơgrong bruă akŏ phun ngă hrŏm hăng djŏp anom bruă iâu pơthưr, pơtô pơjuăt lăi pơthâo tơlơi pơhin kiăng pơtô brơi ƀing hơmâo ană plơi kơnang, ƀing khua đăo, mơnuih djru bruă đăo amăng kual mơnuih ƀôn sang đăo, ngă hrŏm pôr pơhing iâu pơthưr. Juăt lăi pơhmư̆ re se ăt kah hăng pơtô brơi kiăng ngă klă hloh. Hăng ƀing khua, đăo, mơnuih djru bruă đăo ăt pơhiăp hơbit na nao mơn, gum pơgôp hăng ngă hrŏm kjăp tom gong gai plơi pla amăng bruă pôr pơhing iâu pơthưr pơhlom djơ̆ tơlơi kiăng”.

Hăng tơlơi gum ngă bruă mơ̆ng abih bang, dưm kơnar, khut khăt mơ̆ng abih anom bruă čar; tơlơi prăp rơmet hlâo, pơčeh phrâo amăng bruă pôr pơhing; hrŏm hăng tơlơi gơgrong bruă, tư̆ ư kơtang mơ̆ng ƀing khua, mơnuih ping gah hăng abih bang mơnuih ƀôn sang, tơring čar Lâm Đồng prăp lui giong laih kơ hrơi mơak prong mơ̆ng mơnuih ƀôn sang lơ 15/3. Mơ̆ng kual ataih yaih truh pơ plơi prong, bruă čơkă hrơi ruah khua pơ ala mơnuih ƀôn sang dêh čar tal 16 hăng khua pơ ala mơnuih ƀôn sang tơring čar truh pơ să rơwang thun 2026-2031 ƀơi Lâm Đồng bang hyu kơtang biă./.